Iniciativa pol Asturianu avisa d’un recorte posible del 75 por cientu de les hores de Llingua Asturiana y Gallego-asturiano en Bachilleratu

Los planes de la Conseyería d’Educación, Cultura y Deporte pa la entrada de la LOMCE en Bachilleratu supondríen un recorte del 75 por cientu de les hores de Llingua Asturiana. Iniciativa pol Asturianu saca esta conclusión del borrador de currículu unviáu a los centros educativos asturianos.

La materia de Llingua Asturiana y el Gallego-asturiano ye optativa anguaño en competencia con otros idiomes foriatos, con cuatro hores selmanales de clase. Con la entrada de la Llei Orgánica de Meyora de la Calidá Educativa (LOMCE) l’asignatura pasaría a tener un hora selmanal, esto ye, trés menos, amás de siguir compitiendo con otres llingües y Relixón. “Esta decisión ye llamentable y un ataque directu al nivel educativu nel que l’asignatura tien una situación más feble, pues ye en Bachilleratu onde hai un menor porcentaxe de matriculación, frutu de les polítiques d’Educación n’Asturies, qu’eviten que l’asignatura pueda ser materia evaluable na PAU, faciendo que munchos alumnos prefiera optar por otres materies que sí-yos puntúen p’acceder a places universitaries”, espliquen dende Iniciativa pol Asturianu, coleutivu qu’esixe a la conseyera Ana González “que retire de manera inmediata esti borrador de currículu y que dexe a l’asignatura de Llingua Asturiana polo menos nes mesmes condiciones (yá negatives) que tenía hasta agora en Bachilleratu”.

La organización que trabaya pola normalización del idioma muéstrase mui crítica cola socialista, a la que-y pidi esplicaciones al tiempu que-y demanda que “nun recorte todavía más la presencia del asturianu en Bachilleratu, pa lo que-y fadremos llegar un entruga que s’entregará nel Rexistru del Gobiernu d’Asturies”.