Ésta ye la situación a dos selmanes del Tsunami Xixón: siguen les baxes

International Hardcore All Stars ye'l tercer grupu en cancelar la so actuación nel festival depués de los catalanes La Élite y Strangis Guajes.

Dientro de dos selmanes ta marcáu l'entamu de la quinta edición del Tsunami Xixón, festival punk y rock que nació na Llaboral pero que se vio obligáu a emigrar a Parque Inglés por mor de la delicada situación de la cúpula de la ilesia del recintu. Grupos de primer nivel y miles de siguidores tán convocaos el xueves 27 nel llugar qu'agora lleva'l nome de los Hermanos Castro, Jesús y Quini, pa una cita a la que nun-y paren de cayer nomes del cartelu.

Primero foron La Élite y los xixoneses Strangis Guajes, y na tarde-nueche d'ayeri, International Hardcore All Stars, grupu de la cuenca d'El Nalón de versiones que tien a Pirri, d'Escuela de Odio, como cantante. ¿La razón? L'aconceyamientu de responsables del Tsunami col agora presidente de Divertia y edil de VOX, Óliver Suárez Rubio, na sede del partíu, que se difundió la formación política en redes sociales.

"Siendo fieles y consecuentes colos nuesos principios, decidimos nun participar nel Tsunami Xixón", apunta'l grupu nun comunicáu en castellanu redes, "los acontecimientos asocedíos nos díes últimos oblíguennos a desistir". International Hardcore All Stars entiende que "nun ye coherente nin lóxico participar en nada filtrao pola ultraderecha (VOX) que tantu dañu nos fixo per años".

D'igual forma refuga "tol circu mediáticu que se montó per redes sociales con esti tema. Pa lo único que val ye pa enfrentamientos ente xente del mesmu 'bandu". Pieslla'l comunicáu la banda, que taba programada pal sábadu 29, con un "amamos la música, odiamos el fascismu".

Ensin reaición hasta'l momentu

Tsunami, pela so parte, entovía nun reaicionó a les baxes yá comunicaes por estos trés grupos. El so posicionamientu últimu foi l'asoleyamientu'l llunes d'un comunicáu nel momentu nel que la semeya col conceyal de VOX entamó a ser criticada en redes sociales, nel que garantiza que “nos aseguraremos de que tolos artistes nacionales y internacionales que formen parte del festival siempre puedan espresase llibremente y comunicar lo que deseen nes sos lletres en castellano, asturianu, galego, euskara, català, inglés o na llingua que deseen”.

Nel mesmu esplica que pa la correuta realización del certame “ye totalmente necesario aconceyar con cargos eleutos de la ciudá, y con toles sos autoridaes públiques”. “Pa que n’Asturies se siga celebrando ún de los mayores y meyores festivales de punk rock del mundu”, añade'l testu.

Na semeya, International Hardcore All Stars.

pic.twitter.com/9isEVrhfw9

— International Hardcore All Stars (@hardcore_stars) July 12, 2023