Somos Avilés va entregar les dietes por desplazamientu del grupu municipal a la XDLA

La candidatura de xunidá popular avilesina entama una campaña de conmemoración y reivindicación de la llingua asturiana y la so oficialidá coincidiendo cola Selmana de les Lletres Asturianes. Ente les aiciones previstes destaca la entrega de 1.300 euros a la XDLA.

Nun actu que va desendolcase mañana a les 12.30 hores, Carlos Pulgar, voceru de la Xunta pola Defensa de la Llingua Asturiana (XDLA), va recibir nel despachu de Somos Avilés na Casa Conceyu dicha cantidá que correspuende a les dietes por desplazamientu xeneraes nel primer trimestre del 2016 pol grupu municipal "como aportación destinada a ayudar a esta organización cívica a sufragar los gastos que conlleva la so actividá". Enantes, la organización yá fixera lo propio cediendo estes perres a los enzarraos de FAHIME y a los treces vixilantes de seguridá del Hospital San Agustín acampaos frente a les instalaciones del centru como protesta al tar meses ensin cobrar.

Les iniciatives entamaes por Somos Avilés cola fin de "facer más visible tovía'l nuestru apoyu y querencia por esti idioma" principiaron el 21 d'abril cola aprobación d'una moción pa la ellaboración d'unes ordenances d'usu del asturianu col apoyu de los 19 ediles del PSOE, Somos Avilés, Izquierda Xunida (IX), Ciudadanos y Ganemos, y la única oposición de los 6 del PP. Yá mientres la propia Selmana de les Lletres, la candidatura de xunidá popular vien emplegando en redes sociales la etiqueta #avilestamienfala cola qu'asoleya mensaxes referentes a la llingua asturiana.

Participación en 'Conceyos pola Oficialidá'

Los cinco conceyales que conformen el grupu municipal de Somos Avilés van tar presentes como representación política nos actos institucionales entamaos pol Conceyu o pola Conseyería de Cultura del Gobiernu d’Asturies que se desenvuelvan n’Avilés, casu de la XIII Xunta d’Escolinos o la Feria del Llibru y el Discu n’Asturianu, qu'abre les sos puertes el xueves na plaza Domingo Álvarez Acebal. Tamién van participar na manifestación del vienres '¡L'asturianu, llingua oficial!', entamada pola XDLA n'Uviéu por mor del Día de les Lletres Asturianas (19.30 hores, Estación del Norte), tres la pancarta 'Conceyos pola oficialidá'.

D'esta forma, los ediles de la candidatura de xunidá popular sofiten el llamamientu de la organización cívica y del Conceyu de Bimenes pa que sían les entidaes llocales les que garren el testigu na reivindicación de la oficialidá, primer pasu del procesu entamáu pol ayuntamientu yerbatu cola fin d'involucrar a la mayor cantidá de xente posible na declaración d'oficialidá prevista pal 2 de xunetu en Martimporra. Otra manera, Somos Avilés va partipar con pancarta propia na propia manifestación del vienres "como muestra del nuestru apoyu firme a la consecución de derechos pa los/les asturianofalantes".

Por último, cola ocasión que supón la celebración del XXXVII Día de les Lletres Asturianes, la formación va espublizar nel diariu 'La Nueva España' "un artículu fondu y estensu tituláu 'Pasáu, presente y futuru de la llingua asturiana n’Avilés' onde damos la nuestra visión de lo que debería facese en política llingüística nel nuestru conceyu". Mentes, en 'La Voz de Avilés-El Comercio', el conceyal Xune Elipe va asoleyar un artículu de calter más personal entituláu 'Memories d’un neñu asturianu' sobre les sos vivencies y rellaciones col asturianu.

"Toes estes actividaes busquen visibilizar el nuestru apoyu a la reivindicación llingüística y contribuyir a esparder ente la sociedá avilesina un discursu favorable y de respetu pa col asturianu. Too ello vien a complementar y resaltar tovía más el nuestru enfotu normalizador col usu continuáu y cotidianu de la llingua asturiana nel nuestru llabor como representantes políticos de la ciudadanía", afirmen dende Somos Avilés.