Somos Avilés pide que l'idioma tea presente nel mural previstu nun edificiu de Llano Ponte

Va encargase de la so realización l'artista estremeñu Daniel Muñoz 'SAN', qu'anunció que diba llevar "munchu testu".

"Va ser un altavoz de delles coses que pasaron, que pasen y que van pasar o tendríen que pasar. Nun se trata namás de decorar una fachada, sinón de mostrar la historia d'Avilés contada polos sos habitantes, incluyíes les sos inquietúes y reivindicaciones", esplicó recién el de Moraleja énte la so llegada a Avilés pa iniciar la residencia artística mientres la que va desendolcar el proyeutu. Un espaciu, poro, na que la llingua asturiana debería tar presente "como idioma tradicional y propiu del conceyu d'Avilés y patrimoniu de tolos avilesinos y avilesines, bien de nacencia o d'adopción", apunten dende Somos Avilés.

Dende la candidatura de xunidá popular entienden tamién que la situación del edificiu, a la entrada d'Avilés, onde la glorieta de Los Oficios, "fai d'él un escaparate inmeyorable pa visibilizar a la llingua asturiana y da-y normalidá al so usu". Por último, puntualicen que "facemos esti llamamientu agora que tovía nun empezaron les xeres pa la realización del mural y evitar asina que se produza una discriminación pa col idioma asturianu".

Na imaxe, l'edificiu del númberu 50 de la cai Llano Ponte onde va facese un mural de grandes dimensiones.