Somos Avilés pide al Conceyu reconocimientu y sofitu a la banda gaites

El conceyal Xune Elipe amosó nel Plenu l'apoyu de la so formación a Conceyu Abiertu por Noreña "pola persecución llingüística y intolerancia" del PP nel Ayuntamientu.

Somos Avilés presentó un ruegu al Conceyu nel que criticó l'ausencia de la Banda de Gaitas Villa de Avilés na Cabalgata de Reis, "dalgo qu'inesplicablemente vien siendo asina dende l'añu 2005". "La cabalgata no es un espacio apropiado para las gaitas", declaró tres les protestes d'esti añu Ana María Hevia, conceyala Festexos, Eventos, Feries y Mercaos, y Consumu.

"Estes declaraciones nun pueden entendese más que como productu de los prexuicios que sobre la música y la cultura asturiana dexa ver la conceyala del área", aseguró Elipe, qu'apuntó que "creyemos que les gaites son adecuaes pa cualquier tipu d'eventos, seyan del tipu que seyan, y nun quedar arrequexaes a determinaes fiestes o actos". D'igual forma, recordó qu'esti añu la banda de gaites llocal cumple'l so ventenu aniversariu, "un acontecimientu que debería ser apoyáu como se merez por parte d'esti Ayuntamientu, facilitando la so inclusión en toa clas d'actos institucionales o festivos, como reconocimientu al so llabor de divulgación y promoción de la música tradicional asturiana nel conceyu avilesín", amás de que con esti sofitu "taría afitándose y dando continuidá al trabayu que desenvuelve esta banda de gaites al traviés de la so estaya pedagóxica, formando a futuros intérpretes".

"Por ello, rogamos nun vuelvan a reproducise fechos d'esti calter que marxinen les espresiones musicales del país y que priven a los avilesinos y avilesines del so disfrute", finó l'edil de Somos Avilés.

L'anulación de la ordenanza de Noreña

Enantes de la so primer intervención nel Plenu que se vien celebrando dende les 10 hores, Elipe quixo dedicar unes pallabres a la situación que ta viviendo'l Conceyu de Noreña tres l'anulación de les 'Ordenances municipales pal usu de la llingua asturiana nel conceyu de Noreña' por parte del Tribunal Superior de Xusticia d'Asturies tres el recursu presentáu de manera particular por Luis Miguel Suárez González y apropiada pol PP llocal y la so presidenta del partíu n'Asturies, Mercedes Fernández, tres la sentencia. "Dende Somos Avilés queremos mostrar el nuestru apoyu y solidaridá colos compañeros y compañeres de Conceyu Abiertu por Noreña pola persecución llingüística y la intolerancia que padecen por parte del Partido Popular, y por estensión, la que sufrimos tolos y toles asturianofalantes", dixo l'edil.