“Noreña nun va quedar ensin ordenances”, asegura Conceyu Abiertu

Un recursu del popular Luis Miguel Suárez González al alcuerdu plenariu qu'aprobó les ordenances d'asturianu de Noreña llevó al Tribuna Superior de Xusticia d'Asturies (TSXA) a anulales al considerar que nun son “conforme a derechu”. L’Ayuntamientu yá estudia cómo retrucar la sentencia y dende Conceyu Abiertu afirmen que “Noreña nun va quedar ensin ordenances”.

Según la sentencia del TSXA, les 'Ordenances municipales pal usu de la llingua asturiana nel conceyu de Noreña' incumplen dos aspeutos. El primeru atópalu nel artículu 1.1, que reza “la llingua asturiana o asturianu ye, xunto al castellanu, la llingua propia del Conceyu de Noreña, de l’Alministración llocal y de les corporaciones públiques que d’ella dependen”, al entender que esi “xunto” supón da-y al idioma un rangu d’oficialidá, pa lo que l’Ayuntamientu nun tien competencia.

L’otru asuntu ye l’ausencia d’un informe económicu o memoria financiera de les ordenances, puesto que la TXSA considera que “conlleva un costu económicu, yá que se contemplen midíes que suponen un gastu con clara incidencia económica”. El Conceyu de Noreña tien la posibilidá de poner un recursu de casación nun plazu de 30 díes, dalgo no que yá tán trabayando los servicios xurídicos del Ayuntamientu.

Pa contrarrestar la primer supuesta irregularidá que trata la sentencia, Noreña básase nuna sentencia del Tribunal Constitucional del 28 de xunu del 2010 que cita l’informe xurídicu qu’ellaboró Nicolás Bartolomé, encargáu por Planificación Llingüística y Normalización, con motivu de los argumentos qu’utilizó la Delegación del Gobiernu estatal n’Asturies pa tratar de valtar les ordenances d’asturianu de Carreño. Precisamente, por estos argumentos y tres falar con responsables del Conceyu de Noreña, Gabino de Lorenzo decidió nun presentar recursu al alcuerdu plenariu qu’aprobó les de Noreña.

Posible error de procedimientu

Onde sí pue haber más problemes ye na ausencia d’un informe económicu o memoria financiera, lo que pue considerase “un error de procedimientu o fallu alministrativu”, esplica Antonio Martínez Fernández, conceyal de Conceyu Abiertu por Noreña, formación impulsora de les ordenances. Esti asuntu, sicasí, nun preocupa, “yá que ye dalgo que se pue solucionar”.

Lo que tien nidio l’edil ye que “Noreña nun va quedar ensin ordenances”. “L’abogáu yá nos dixo de la esistencia d’esa sentencia del Constitucional y pa nós ta claro que la llingua propia de Noreña y Asturies ye l’asturianu”, añade Martínez Fernández, qu’especifica que, más alla del términu ‘propiu’ o ‘tradicional’ que pue llevar esi artículu, “lo importante son les midíes y derechos que recueyen les ordenances, y ehí ye dalgo no que nun entra la sentencia”.

Nos díes próximos, Alcaldía va tratar xunto colos servicios xurídicos municipales les posibilidaes d’aición énte la sentencia del TSXA que la líder del PP, Mercedes Fernández, ta festexando como un ésitu. “Queremos l’asturianu de toos, non la cooficialidá d’un artificiu construyíu por unos pocos”, declaró na propia población de Noreña, onde se desplazó a dar l'anuncia de la decisión xudicial.