Sindicalistes de COAG-Asturies en Hong-Kong aseguren que se prepara’l desaniciu de l’agricultura tradicional

Ayeri entamó en Hong Kong la xunta de la Organización Mundial de Comerciu (OMC), cume qu'aconceya cada dos años a los representantes de los 149 estaos que pertenecen a la OMC pa tratar los temes clave en materia de comerciu internacional dientro de la ronda d'alcuerdos de Doha, capital del Qatar onde entamaron estes xuntes nel añu 2001. Esti cume tien ente los sos puntos más importantes la lliberalización de la política agrícola mundial, un asuntu que repercute n'Asturies, que, con ser una parte mínima de la producción agrícola mundial, tien nel campu una de les sos señes d'identidá. El sindicatu agrícola COAG - Asturies tien estos díes nel antiguu protectoráu británicu al so delegáu Juan José Menéndez, que fai dende allá una llectura mui negativa de los alcuerdos que cuenten con roblase nel alcuentru.

Sigún la delegación de COAG en Hong Kong, que participó ayeri nuna marcha de protesta xunto con otros 4.000 dirixentes mundiales de la plataforma Via Campesina, l'oxetivu final de la OMC y de la Política Agraria Comunitaria (PAC) que va defender el primer ministru d'Inglaterra y presidente de turnu de la Unión Europea Tony Blair nel cume "ye'l de la lliberalización total de los mercaos mundiales pa que nellos puean movese ensin torga nin pilancu nengún les grandes empreses y corporaciones agroalimentaries multinacionales que controlen la cadena alimentaria".


El representante de COAG diz que la lliberalización que va dar un pasu alantre en Hong Kong tiense n'estratexes de "dumping" que consisten en pagá-yos los productos perbaxo de los costes reales a los productores en países poco desarrollaos pa vendelos dempués a precios muncho más altos nos países desarrollaos, y n'adoptar métodos de cultivu antiecolóxicos que pasen pel envelenamientu del suelu con pesticides n'agricultura. Nel casu de la ganadería, la medicación y cebáu con piensos artificiales de los animales ye la otra cara de la mesma moneda pal sindicalista, que tamién llamenta que mientres ocurre esto, los agricultores tan entrando nuna carrera de competición ente ellos que nun cría un bon ambiente y que namas val pa da-y más ventaya al conglomeráu d'empreses que remanen la situación, polo que fai un llamáu a que nel campu asturianu desapaeza la palabra "competitividá" y se sustituya pola palabra "cooperación".

COAG afirma que ye preciso cortar pela freba la carrera pola lilberalización de los mercaos y les producciones agrícoles, que al so paecer namás va valir pa dexar el campu en manes de los más fuertes. Pal sindicatu asturianu, l'alternativa pasa peles ayudes y incentivos a l'agricultura campesina y familiar en tolos países, camín pa llograr la soberanía alimentaria de cada territoriu, de manera que cada país y rexón produzan preferentemente pa ellos mesmos.