"Si la familia usa l'asturianu, los neños y les neñes van tener munches ventayes pa deprender otres llingües", diz López

La Casa Conceyu de Xixón acoyó esti llunes l'actu de presentación del IV Día de la Reciella, que va tener como sede'l domingu'l Muséu del Pueblu d'Asturies. La edil Ana Montserrat López Moro defendió l'usu del asturianu nel llar al consideralo una ventaya "pa deprender otres llingües".

Xunto a la conceyala d'Eduación y Cultura participó nel actu María Xosé Rodríguez, responsable de la Oficina de Normalización Llingüística; Mario Suárez del Fueyo, de Xixón Sí Puede; y Lara María Martínez Fernández, del PSOE; amás de los representantes de 'Reciella, Families pol Asturianu' David Guardado y Iris Díaz que dieron anuncia de toles actividaes que van facese nesta cuarta edición del Día de la Reciella. Tamién tuvieron presentes el realizador Pablo Quiroga y Xandru Vega, gaiteru de Skama la Rede, que presentaron el videu promocional de la xornada y de la carrera.

La principal novedá de la xornada ye 'Entaína', una carrera que tien un calter festivu, y non competitivu, y que va tener un llargor d'un quilómetru namás, lo que permite a tol mundu participar.

Esta marcha ta programada pa les 11:00h. y pa participar ye necesario inscribise. Depués habrá un partíu infantil de fútbol con xugadores del U.C. Ciares. Otres actividaes de la mañana son xuegos tradicionales, cuentacuentos con Olga Cuervo y talleres pa neños. Dempués de xintar tan previstos más talleres como los dedicaos al mundu de les abeyes o a facer xuguetes, y llambiotaes. Na tarde tamién va haber cuentacuentos con Samalandrán, Islla de lleendes, enantes de les actuaciones musicales de la Banda de Gaites Infantil de Villaviciosa, el Trubiecu,  y de les canciones de "Bestiariu".