Asturies ye’l territoriu con mayor porcentaxe de sentimientu tantu asturianu como español ente la población, según un estudiu del CIS

Un 80 por cientu de los habitantes d’Asturies siéntese tan asturianu como español, según una encuesta del CIS fecha nel 2013 y espublizada recién. Trátase del porcentaxe más altu de sentimientu 'doble' de tol Estáu y supón un incrementu del 15,5 por cientu en comparanza col 2011.

Estos datos apaecen nel décimu estudiu del Centru d’Investigaciones Sociolóxiques (CIS) ‘Defensa nacional y fuerzas armadas’, fecha en setiembre del 2013 mediante encuestes personales en domicilios ente 2.479 mayores de 16 años de toles comunidaes y ciudaes autónomes, 65 d’elles n’Asturies. Éstos establecen qu’un 13,3 por cientu de los asturianos namái tien sentimientu español (un 2 por cientu más qu’hai dos años) por un 5 por cientu que tien pertenencia al país, una cifra un 17,6 por cientu menor que nel estudiu anterior. Sicasí, el datu más destacáu ye’l 80 por cientu de persones que se sienten tan asturianes como españoles, porcentaxe más altu de tol Estáu. Murcia (77,3 por cientu), Ceuta (75) y Galicia (72,1) siguen a Asturies nesta llista. Mentes, Navarra lidera’l sentimientu d’identidá propio con un 52,9 por cientu (41,2 doble y 2,9, español), por un 44,1 d’Euskadi (38,1 doble y 10,2, español) y un 39,8 de Catalunya (35 doble y 22,2, español). Asturies asítiase na parte baxa nesta estaya col so 5 por cientu, a niveles asemeyaos a Castilla-La Mancha (4,5 por cientu) o la Comunitat Valenciana (6,6).

Nel sentíu contrariu, Melilla ye’l territoriu con más sentimientu español (75 por cientu; un 25 por cientu doble y un 0 propiu), siguío pola Comunidad de Madrid, con un 39,4 por cientu (43,4 doble y 8,6, propiu) y la Comunitat Valenciana, con un 38,7 por cientu (50,9 doble y 6,6 propiu). La media estatal ye de 24,5 por cientu español, 54,5 doble y 17,4, propiu.

Si afondamos más nesta parte del estudiu, observamos qu’ente los 65 encuestaos n’Asturies, 5 dicen ser namái españoles (8,3 por cientu), 3 más españoles qu’asturianos (5 por cientu), 48 tan españoles como asturianos (80 por cientu), 3 más asturianos qu’españoles (5 por cientu) y nengún namái asturianu (0 por cientu). Mentes, una persona (1,7 por cientu) optó pol ‘Nun sabe/Nun contesta. Euskadi, con un 25,4 por cientu, ye onde más xente aseguró tener un sentimientu únicu pol so territoriu.

Un 55 por cientu, mui arguyosu de ser español

Otres entrugues del estudiu dexen datos llamativos. Asina, un 55 por cientu de los encuestaos n’Asturies dicen tar mui arguyosos de ser español, por un 40 que diz tar bastante arguyosu, un 3,3 pocu arguyosu y un 1,7 nada arguyosu. Con respeuto al sentimientu que-y produz la bandera española, un 18,3 por cientu respondió ‘una emoción mui fuerte’, un 43,3 ‘dalgo d’emoción’, un 16,7 ‘mui poca emoción’, un 18,3 ‘nada especial’ y un 1,7 según l’actu. No que respeuta al himnu, un un 20 por cientu señaló ‘una emoción mui fuerte’, un 41,7 ‘dalgo d’emoción’, un 20 ‘mui poca emoción’, un 15 ‘nada especial’ y un 1,7 según l’actu.

Nel supuestu d’un ataque contra España, el 18 por cientu de los asturianos encuestaos afirmen que participaría na so defensa, un 25 apunta que ‘probablemente sí’, un 12 que ‘probablemente non’ y un 15 refúgalo con total seguridá. Mentes, un 22 optó por ‘Nun sabe’. Con respeuto a los datos del 2011, un 10,23 por cientu más (33,1 por cientu hai dos años) participaría na defensa voluntaria d’España.