“Sentémonos y esplíquennos qué ye lo que quieren facer”, reclama Queipo

El secretariu xeneral del PP, Álvaro Queipo, foi l’únicu de los diputaos de los partíos que s’oponen a la oficialidá qu’amosó una postura sensanta na Comisión de Cultura, col restu perdíos na discusión sobre la llingua propia, l’independentismu y Catalunya, per un llau, y “los bables”, pel otru. “Sentémonos y esplíquennos qué ye lo que quieren facer”, reclamó’l popular al Gobiernu.

“Nun se pue facer un llamamientu a los partíos políticos a dar un votu a favor pa dalgo que nun sabemos cuál va ser el so alcance final y, poro, les sos consecuencies a la hora d’aplicase”, apuntó’l de Castropol na comparecencia d'Antón García, direutor xeneral de Política Llingüística a pidimientu de Ciudadanos. “Esto ye dalgo tan razonable qu’inclusive aquellos que defenden de la manera más virulenta la oficialidá deberíen tar protestando contra’l presidente del Gobiernu por tar intentando facer d’esti procesu una pantomima. Sentémonos, traigan a esti Parllamentu una Proposición de Llei qu’estimen oportuna pal desarrollu d’esa oficialidá”, pa conocer el so desarrollu, qué puntos tocaría o la inversión necesaria, especificó.

“Si ye amable o nun lo ye, veríamoslo nesa llei”, siguió Queipo, que rescampló que “a partir d’esi puntu podría venir lo demás. Pero facelo al revés ye simplemente un fraude; un fraude pa los asturianos y pa esta Cámara”. “Señoríes, enantes de dereches o d’izquierdes somos asturianos. Sentémonos y esplíquennos qué ye lo que quieren facer”, reclamó pa finar al Gobiernu depués de calcar na importancia “d’un patrimoniu llingüísticu que ye de tolos asturianos”.

Recuerdu pa Marqués

Enantes el popular tuvo unes pallabres pal ex presidente Sergio Marqués y recordó que la so formación foi, ensin nomar al Partíu Asturianista (PAS), el qu’impulsó la Llei d’Usu y Promoción del Bable/Asturianu. “Nengún partíu tien un historial de serviciu tan llimpiu coles llingües d'Asturies como'l PP”, defendió.

Los otros dos diputaos con postures contraries, Luis Armando Fernández Bartolomé por parte de Ciudadanos y Pedro Leal por cuenta propia anque siga nel grupu parllamentariu de Foro, con VOX ausente, centráronse en facer “valoraciones como filólogu o como llingüista”, como bien definió’l propiu Queipo pa esplicar qu’él namái diba a entrar “en cuestiones polítiques”. Asina’l primeru perdióse nun discutiniu sobre’l términu llingua propia y les consecuencies que tuvo l’usu del mesmu, na so opinión, n’otros llugares, centrándose sobre manera en Catalunya, asina como la rellación de les oficialidaes col independentismu, que teme aporte a Asturies.

Pela so parte, Leal recuperó’l vieyu discursu de “los bables”, negó la esistencia d’un consensu social al rodiu de la oficialidá del asturianu y centróse na Llei d’Usu y na ellaboración del so Reglamentu, 23 años depués, como alternativa. Tanto Rafael Palacios, por Podemos, como Ángela Vallina, por Asturies pela Izquierda (IX-IAS), dambos favoratibles a la oficialidá, foron críticos con estos discursos nes sos intervenciones.

El de Ciañu entrugó a García poles perres destinaes dende la Conseyería de Cultura, Política Llingüística y Turismu a la RTPA pa la ellaboración de programes n'asturianu, pola situación de la especialidá docente y pola reconocencia de les pruebes de certificación adaptaes al Marcu Común Européu de Referencia pa les Llingües. Por parte socialista, intervieno Noelia Macías pa emponderar el llabor del departamentu de Política Llingüística.