Piñán esixe a Leal “seriedá, respetu y rigor al abordar temes qu’afeuten a los derechos fundamentales” como la oficialidá

El diputáu espulsáu de Foro, Pedro Leal, entrugó a la conseyera Berta Piñán sobre’l costu de la oficialidá na Comisión de Cultura, Política Llingüística y Turismu, pa lo qu’emplegó’l discursu de “los bables”. “Pidiría-y un poco de seriedá, respetu y rigor a la hora d’abordar temes qu’afeuten a los derechos fundamentales de la ciudadanía”, retrucó-y.

Una vegada más, la escritora tuvo qu’esplicar cómo funciona’l procesu d’oficialización d’una llingua nel marcu llegal actual. “Nun hai una única oficialidá nin un modelu únicu”, entamó Piñán, apuntando llueu que “cada comunidá autonóma regula’l so réxime llingüísticu atendiendo a la so realidá sociollingüística, sociopolítica y económica” y que “el modelu d’oficialidá del asturianu y eonaviego será’l qu’alcuerden vustedes, señores diputaos, frutu del diálogu y del mayor consensu posibles”.

Poro, “ensin consensuar el modelu, ponese a falar de costos ye una imprudencia que nos llevaría a cometer multitú d’inesactitúes, por nun dicir que ye un exerciciu temerariu de demagoxa”. Más alantre, tres la réplica de Leal, tuvo qu’añadir que “el modelu nun se define nel Estatutu, promúlgase a posteriori nuna Llei de Normalización, que va aprobar esta Cámara, que determinará l’alcance de la política llingüística, el modelu d’implantación y desarrollu, y inclusive la dotación presupuestaria d’eses polítiques”.

El diputáu diríxose a Piñán como “la conseyera del monotema del señor Barbón”, espuso-y datos económicos y d’emplegu d’Asturies, “que sufre la mayor decadencia d’España”, y insistió cola “memoria económica” de la oficialidá enantes de reformar l’Estatutu. Llueu refirióse a “una operación clientelar subvencionada de fabricación d’una llingua que sólo serviría al bolsu d’unos pocos col preciu d’envenenar el caráuter entreñable de los bables vivos y populares sustituyéndolos por una llingua artificial cara y antipática pa la mayoría de la xente”, amás de crear “un chiringu nuevu de votantes”.

“Vusté nun falaba hai 3 o 4 años de los bables”

La de Cañu soprendióse con esti discursu. “Supongo que responderá a dalguna cuestión personal o dalguna cuestión biográfica, porque ye llamativa que tenga esa capacidá demagóxica nel tema de la llingua asturiana, amás sabiendo la so trayeutoria nel mesmu partíu, Foro Asturies, cuando defendía la normalización. Vusté nun falaba hai 3 o 4 años de los bables”, apuntó.

“Pidiría-y un poco de seriedá, respetu y rigor a la hora d’abordar temes qu’afeuten a los derechos fundamentales de la ciudadanía y de les persones”, siguió la conseyera, que quixo insistir “en dos aspeutos a los que vusté nun fai nenguna referencia, entiendo qu’interesadamente. La primera ye que les llingües propies nun suponen un gastu, sinón que creen un sector productivu que tien per delantre un enorme potencial de desenvolvimientu y inversión, y qu’arriquez cultural y económicamente a la sociedá que s’ocupa d’elles. Y en segundu llugar, que la oficialidá supondría l’accesu de les industries culturales nes llingües propies a ayudes y subvenciones estatales y europees agora denegaes”.