Seis grupos van participar en Candás nun Bailla na Plaza solidariu col pueblu ucraín

Les perres recaudaes van dir pa la ONG Ayuda Humanitaria para Ucrania desde Asturias.

La plaza La Baragaña, sede de los Bailla na Plaza qu'entama'l Grupu Baille San Félix, entama una edición nueva d'esta iniciativa solidaria. Nesta ocasión la vista ponse nel pueblu ucraín, que ta sufriendo les consecuencies de la guerra.

La cita va ser el sábadu, dende les 20 hores, cola participación de seis grupos que trabayen nel caltenimientu de la música tradicional asturiana. Asina, van tar en Candás, amás de San Félix, l'Asociación Cultural Escontra'l Raigañu, el Grupu Folclóricu Trebeyu, Abéu, Calea y Eva Tejedor & Les Pandereteres.

El dineru que se saque nel chigre va destinase a mercar comida pa unviar a los territorios d'Ucraína más necesitaos.

Na semeya, una actuación reciente del Grupu Baille San Félix.