Sanjurjo defende la voluntariedá nel usu d’idioma tres reconocer que namái faló gallego-asturiano hasta la escuela

|
Actu institucional de la XXXIX Selmana de les Lletres Asturianes

El presidente de la Xunta Xeneral, Pedro Sanjurjo, defendió na llectura institucional de la Xunta Xeneral pola Selmana de les Lletres Asturianes la voluntariedá nel usu del idioma depués de reconocer que namái faló gallego-asturiano hasta la escuela. Na so opinión el derechu a nun perder la llingua ta recoyíu nel marcu llegal actual.

El socialista, natural d’Abres, emplegó’l gallego-asturiano p’afirmar que ye “la llingua que foi de los mios güelos, de los mios padres y entovía de los mios hermanos. La que se falaba na mio casa y la única que conocí enantes de dir a la escuela”, destacó, pa depués apuntar “que naide, o mui pocos, va defender con más convicción el derecho de nun perder a nosa fala”. Na so opinión esti derechu ta recoyíu nel marcu llegal actual, esto ye, l’Estatutu d’Autonomía y la Llei de Promoción y Usu del Bable/Asturianu, amosando asina, ensin citalo, la so postura contraria a la cooficialidá –aprobada poles bases del so partíu– nuna cita tan señalada.

“Güei quiero insistir nel conceptu de voluntariedá”, siguió. “Les llingües válennos cuando nos sirven, cuando se caltienen vives, cuando se falen, cuando la xente fáenles de so y non cuando s’imponen. Pa caltener viva una llingua hai que querela, prestixala, falala y non imponela”, dalgo que se considera que “nun se pue facer dende los sentimientos, sinón dende’l respetu ensin escrúpulos a los derechos, tanto de los que falen asturianu en cualquiera de les sos varientes como de los que nun lo falen”.

Tres esta intervención de Sanjurjo comenzaron les llectures, siendo la primera la del conseyeru d’Educación y Cultura, Genaro Alonso, que se situós na Mesa de la Cámara xunto con Marta Mori, vicepresidente de l’Academia de la Llingua Asturiana, y los escolinos Nerea Delgado, del Colexu Públicu Buenavista I d’Uviéu, y Sergio Suárez Calmaestra, del Colexu Públicu Villalegre d’Avilés. En total, mediu centenar d’alumnes y alumnos d’estos centros tuvieron presentes esta mañana na Xunta Xeneral.

Amás d’estudiantes, Pilar Valera, Cristina Coto, Nicanor García, Fernando Padilla, Almudena Cueto, Nuria Devesa, María del Carmen Fernández Gómez, Andrés Fernández Vilanova ‘Ron’, María Gloria García Fernández, María Lorena Gil, Francisco Laviana, Enrique López Hernández, Concha Masa, Begoña Serrano, José Ramón Tuero, Cristina Valdés, Ovidio Zapico, Vicente Hoyos, Pilar Fernández González y José Antonio García Fernández lleeron testos d’autores como Sofía Castañón, Berta Piñán, Xulio Berrros, Dolfo Camilo Díaz o Milio Rodríguez Cueto, ente otros.

Contador Estadistiques