Sánchez sal investíu presidente del Estáu tres una votación axustada ensin sorpreses

167 votos a favor por 165 en contra. Pedro Sánchez salió investíu presidente del Executivu estatal na segunda votación, na que ye necesaria una mayoría simple, y va formar Gobiernu, el primeru de coalición de la Democracia tres l’alcuerdu con Xuníes Podemos.

Más de 8 meses depués de les eleiciones anticipaes, tres una repetición eleutoral, l’Estáu yá tien presidente. Sigue al frente d’España’l socialista Sánchez, hasta agora en funciones, anque nesta ocasión va tener sentáu nel Conseyu de Ministros a representantes de la formación liderada por Pablo Iglesias, previsible vicepresidente segundu del Gobiernu con competencies n’asuntos sociales.

El PSOE, nuna negociación liderada pola diputada asturiana Adriana Lastra, algamó’l sofitu de Xuníes Podemos y les sos confluencies, EAJ-PNV, Más País-EQUO, Nueva Canarias, BNG y Teruel Existe. Un total de 167 votos que, xuníes a les astenciones d’ERC y EH Bildu, permiten la investidura.

Mentes, votaron en contra Foro, PP, VOX, Ciudadanos, Junts per Catalunya-Junts, CUP, Navarra Suma y PRC. La diputada de Coalición Canaria, Ana Oramas, optó tamién pol ‘Non’ desobedeciendo asina la decisión de la formación nacionalista.

“La Asturies obrera”

El Plenu d’investidura entamó’l sábadu cola intervención de Sánchez y tuvo marcáu pola tensión alta y les descalificaciones ente diputaos, principalmente dende les formaciones de la derecha, nun ambiente vergoñoso. La primer votación, el domingu, finó con 166 ‘sí’ frente a 165 ‘non’ –cola ausencia d’una diputada enferma de cáncer, sí presente esta mañana, Aina Vidal–, polo qu’hebo que pasar a una segunda esta mañana al nun algamar el socialista la mayoría absoluta (176 votos).

Güei tornaron a intervenir brevemente tolos voceros parllamentarios y la confrontación nun tuvo ausente. Denunciáronse presiones a dellos diputaos, tanto a socialistes como al representante de Teruel Existe, Tomás Guitarte, que tuvo que dormir nun llugar secretu por motivos de seguridá, pa camudar el so votu y evitar un Gobiernu de Sánchez.

El diputáu de Foro, Isidro Martínez Oblanca, nun utilizó munchu tiempu nel estráu na de so. Confirmó’l so ‘non’ al socialista y afirmó que “los asturianos”, al igual que’l restu de ciudadanos del Estáu, “tienen el derechu a nun ser más que naide, pero tampoco menos que los demás”.

Asturies tamién se citó na intervención d’Oskar Matute, voceru d’EH Bildu, que fixo colos 52 diputaos de VOX saliendo de la sala en mou de despreciu al vascu. El parllamentariu defendió la solidaridá ente pueblos, citando delles nacionalidaes del Estáu, ente elles “la Asturies obrera”.