Sánchez medita adelantar les eleiciones col 14 d’abril y el 26 de mayu como alternatives

Separtar les Estatales coles Europees, Nacionales y municipales o celebrar un ‘superdomingu’ eleutoral. Son les dos alternatives que manexa anguaño’l presidente del Gobiernu Pedro Sánchez énte la falta d’alcuerdu colos nacionalistes catalanes p’aprobar les cuentes.

L’axencia Efe espublizó güei una información na qu’afitaba’l 14 d’abril como la fecha escoyida pol socialista nel casu de que’l miércoles caigan nel Congresu los Presupuestos Xenerales del Estáu na votación de les enmiendes a la totalidá. La necesidá de contar colos apoyos de los nacionalistes catalanes, colos que nun hai agora negociación pola negativa del Executivu de tratar sobre’l derechu a l’autodeterminación, dexa a Sánchez ensin marxe de maniobra pola inestibilidá que provocaría gobernar ensin cuentes.

Sicasí, dende’l PSOE descartóse que se valore'l convocar eleiciones pa esa fecha, como aseguró esta mañana Adriana Lastra. Pa ello, deberíen disolvese les Cortes el 19 de febreru  pa cumplir colos 54 díes qu’afita la llei.

La otra alternativa que se manexa ye entamales pal 26 de mayu, convirtiendo esta cita nun ‘superdomingu’ eleutoral, dalgo que nun presta a les federaciones socialistes d'aquelles autonomíes que celebren eleiciones esi día pa los sos parllamentos. Pa esta xornada les asturianes y asturianos tán convocaos pa votar a los sos representantes na Xunta Xeneral, nos conceyos y nel Parllamentu européu.

Na imaxe, Sánchez na so intervención ayeri nun actu del so partíu en Santander. Semeya propiedá del PSOE.