Sánchez gana les primaries del PSOE

El madrilanu superó a Susana Díaz n'Asturies, que tenía l'apoyu de los dirixentes de la FSA.

Col 99,23 de los votos contaos, Pedro Sánchez resultó escoyíu como secretariu xeneral del Partido Socialista Obrero Español (PSOE) col 50,51 por cientu del total, al rexistrar 74.223 apoyos. L'andaluza Díaz recibió 59.041 (39,94 por cientu) y Patxi López 14.571 (9,85 por cientu).

N'Asturies, el de Tetuán consiguió un meyor resultáu qu'a nivel estatal, algamado un 53,41 por cientu (3.578 votos), pol 39,62 de Díaz (2.654) y el 6,97 de López (467). La presidenta d'Andalucía nun consiguió ganar n'Asturies pese a contar col sofitu de los dirixentes principales de la FSA. Namái Adriana Lastra y María Luisa Carcedo posicionáronse a favor de Sánchez.

El secretariu xeneral nuevu del PSOE vuelve al cargu que dexó'l 1 d'ochobre al presentar la so dimisión tres el bloquéu que vivió de compañeros del partíu, instaurándose asina una xestora presidida pol asturianu Javier Fernández. Sánchez va tener agora la xera difícil de recuperar a un partíu con una fonda división interna.