Los llectores d’Asturies.com consideren que los cambios nel PSOE nun van variar la política de la FSA

La victoria de Pedro Sánchez nes primaries del PSOE, con meyores datos n’Asturies qu’a nivel estatal, nun va trayer cambios na política que vien desendolcando la FSA nel país. Un 78 por cientu de los usuarios d’Asturies.com son d’esta opinión.  

La entruga plantegada nesta ocasión en 'Conceyu Abiertu' yera ‘¿Considera que los cambios nel PSOE van tener consecuencies nes polítiques que desendolca la FSA?’, a lo qu’un 78 por cientu respondió ‘Non, ye sólo una llucha de poder interna que nun va provocar cambios na so llinia d’actuación n’Asturies’, por un 22 por cientu que prefirió la opción ‘Sí, van trayer un averamientu a sectores más d’izquierda’. La cúpula de la FSA y el Gobiernu de Javier Fernández, cola esceición única del dimitíu Francisco Blaco, amosaron el so sofitu a Susana Díaz, que n’Asturies namái tuvo un 39,62 por cientu de los votos de la militancia (2.654), por un 53,41 por cientu (3.578 votos) de Sánchez, siendo’l resultáu estatal del madrilanu del 50.51 por cientu.

La tensión ente ‘susanistes’ y ‘sanchistes’ dientro de la FSA ye evidente, siendo Adriana Lastra y María Luisa Carcedo les cabeces más visibles qu’apoyaron al reescoyíu secretariu xeneral del PSOE. Javier Fernández yá anunciara que nun diba presentase a la reeleición como dirixente máximu de la federación asturiana.

Dende esti momentu yá ye posible participar nun ‘Conceyu Abiertu’ nuevu. Nesta ocasión prestaríanos conocer la opinión de los nuesos llectores sobre les polítiques de proteición al llobu y al osu énte los ataques a la ganadería que se tán viviendo nos tiempos últimos.