‘San Juan de la Arena’ yá ye oficialmente L’Arena

|
‘San Juan de la Arena’ yá ye oficialmente L’Arena

Esti vienres espublizóse nel BOPA la toponimia oficial nueva de Sotu’l Barcu, la tradicional, que deroga la castellana. ‘San Juan de L’Arena’ recupera’l nome más emplegáu na zona, L’Arena, al igual qu’otros llugares del conceyu, como Ricuevas o La Imera.

Tres quedar aprobáu l’espediente toponímicu’l xueves pasáu en Conseyu de Gobiernu, güei cubrióse’l trámite últimu cola espublización nel Boletín Oficial del Principáu d’Asturies (BOPA), entrando ésti en vigor. Asina, la nomes de llugar tradicionales de Sotu’l Barcu pasen a ser los oficiales del conceyu.

‘San Juan de la Arena’, poro, cambia a L’Arena, denominación que ye l’habitual ente los habitantes de la zona, mentes que la capital del conceyu queda en Sotu. La parroquia de ‘Corrada’ recupera l’artículu y oficialmente conviértese en La Corrada, y poblaciones como Ricuevas (‘Riocuevas’), La Imera (‘La Bimera’), Santolaya (‘Santa Eulalia’) y Los Calgüetos (‘Los Calbuetos’) tamién camuden el topónimu castellanu pol asturianu.

Sotu’l Barcu conviértese nel cincuentenu sestu conceyu qu’oficializa la so toponimia tradicional y nel terceru que l'aprueba recién, tres Candamu y Tinéu, tando a puntu de dar el mesmu pasu Peñamellera Alta y Tapia, mentes que Cabrales, Llanera, Castropol, Cuaña, Les Regueres, Onís y Somiedu tienen el procesu mui avanzáu. Cuideiru, Villayón, Ayande, Caravia, Ibias, Peñamellera Baxa, Salas, San Tiso d'Abres y Uviéu yá pasaron la fase d'apertura d'espediente.

Semeya obra d'Asturkian baxo llicencia CC BY-SA 4.

AdxuntuTamañu
PDF icon BOPA toponimia oficial Sotu'l Barcu284.33 KB
Contador Estadistiques