El Gobiernu aprueba la oficialización de la toponimia tradicional de Sotu'l Barcu

El decretu va espublizase nos díes próximos nel BOPA, momentu nel qu'estos nomes de llugar van pasar a ser los únicos oficiales.

El Conseyu de Gobiernu celebráu esta mañana dio lluz verde al espediente que recueye la toponimia tradicional de Sotu'l Barcu, que va pasar a ser la oficial, derogando la so forma castellana. D'esta manera, van ser 56 los conceyos que cumplieron esti trámite dende'l 2005.

Peñamellera Alta y Tapia van ser los siguientes en dar el pasu, mentes que Cabrales, Llanera, Castropol, Cuaña, Les Regueres, Onís y Somiedu tienen el procesu mui avanzáu. Cuideiru, Villayón, Ayande, Caravia, Ibias, Peñamellera Baxa, Salas, San Tiso d'Abres y Uviéu yá pasaron la fase d'apertura d'espediente.