Salú torna a rebaxar les restricciones pal ociu nocherniegu

Va poder pesllar a les 4 hores, mentes que'l restu de la hostelería queda habilitada pa facelo según la so llicencia. Esti xueves rexistráronse 20 casos nuevos de COVID-19.

Cuatro díes depués de la flexibilización de midíes pal ociu nocherniegu, llega un paquete nuevu de midíes que da más posibilidaes a estos negocios. Éstes van entrar a valir esta medianueche.

Los llocales van poder trabayar hasta les 4 hores, mentes que'l restu de la hostelería fadrálo hasta la hora que marca la so llicencia. Amás autorízase l'axuntamientu d'hasta 10 persones non convivientes nel interior de los chigres, que se caltién en 6 nos establecimientos d'ociu nocherniegu.

Amás, sacante estos últimos, va facilitase l'usu de les barres siempre que se cumpla la distancia de seguranza de 1,5 metros. Otra manera, autorícense les actuaciones musicales en direuto con públicu sentáu y los bailles n'esterior con mázcaru, y tamién se flexibilicen los normes pa práutiques deportives y l'asistencia a actos culturales.

Ensin finaos

La Conseyería de Salú comunicó la detección ayeri de 20 casos nuevos –los datos oficiales resten 1 por un duplicáu'l martes–, mesma cantidá que'l llunes y la más baxa dende'l 7 de setiembre del añu pasáu, cuando, llueu d'una revisión, se rexistraron 14. Fixéronse 1.830 pruebes de diagnósticu d'infeición activa, polo que la tasa de positiviá s'asitió nel 2,46 por cientu, siendo esti porcentaxe a 7 díes del 2,49 por cientu.

Nun hebo que llamentar finaos cola enfermedá causada pol coronavirus SARS-CoV-2, polo que'l total de muertes nel andanciu caltiénse en 2.060. 51 persones tán hospitalizaes en planta con confirmación o sospecha de COVID-19, 1 más que'l miércoles, a los qu'hai que sumar otres 17 ingresaes na UCI, 3 menos que nesa xornada.

Na semeya, Rafael Cofiño, direutor xeneral de Salú Pública, encargáu d'informar de les novedaes decidíes nel Conseyu de Gobiernu d'esta mañana.