Los contaxos algamen el nivel del branu pasáu

La selmana pasada detectóse una media diaria de 20 casos nuevos de COVID-19.

Ésta arrancó con 70.527 positivos confirmaos y finó con 70.668, lo que da un total de 141 contaxos, cuando na anterior hebo 296. Son cifres equivalente al branu pasáu, enantes del ascensu de casos que llevó a la segunda fola en seronda.

Dende qu'Asturies.com vien rexistrando esti datu, a lo último d'agostu, nunca se rexistrara una cifra tan baxa. La evolución nesti tiempu foi la siguiente: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493, 423, 289, 194, 133, 77, 60 y 42, hasta los 20 actuales.

Esta situación coincide col arranque del cursu escolar y universitariu, lo que da tranquilidá a profesoráu y alumnáu, y lleva una rebaxa de les restricciones esistentes pola pandemia. Amás les cifres siguen una tendencia descendente, yá que la Conseyería de Salú comunicó esta fin de selmana 50 casos nuevos: 20 el vienres, 14 el sábadu y 16 ayeri.

La tasa de positividá diaria nesti día últimu foi del 2,12 por cientu, siendo esti porcentaxe a 7 díes hasta enantes de l'actualización, con cifres del xueves, del 2,49 por cientu –ayeri baxó al 2,12 por cientu–.

Un fináu

Esta fin de selmana hebo que llamentar la muerte d'un home de 66 años, que se rexistró'l sábadu. Ye la 2.061 del andanciu –la revisión de los datos incorpora un fináu más pa poner el total en 2.062–.

Hai 53 pacientes hospitalizaos en planta con confirmación o sospecha de COVID-19, 2 más que'l xueves. Mentes, hai otros 13 ingresaos na UCI, 4 menos que nesa xornada.

Na semeya, equipu de vacunación móvil que ta percorriendo Asturies p'alministrar les dosis a les persones qu'entovía nun se vacunaren na so visita a Uviéu a lo primero d'esti mes.