Salú comunica 84 casos nuevos de COVID-19

Xixón y Ponga entren n'alerta naranxa, estáu nel que van siguir una selmana más Llaviana, Samartín del Rei Aurelio y Llangréu.

La Conseyería de Salú notificó al Ministeriu de Sanidá 84 casos positivos por coronavirus SARS-CoV-2 diagnosticaos ayeri, que ponen el total de la serie en 6.000. Toles persones afeutaes presenten síntomes leves o son asintomátiques y tán aisllaes nos sos llares.

El Serviciu de Salú del Principáu d'Asturies (SESPA) fixo 2.596 pruebes PCR, polo que la tasa de positividá asitióse nel 3,2 por cientu. La cifra nel país sigue perbaxo del 5 por cientu, barrera qu'afita la Organización Mundial de la Salú (OMS) como marcador de que la pandemia ta empezando a descontrolase.

Na xornada produxéronse 7 ingresos hospitalarios de persones diagnosticaes en díes anteriores. Según los datos oficiales, hai agora na UCI 21 persones y 70 en planta.

Aumentu de les midíes de prevención y proteición

Ayeri tamién se decretó l'alerta naranxa en Xixón y en Ponga énte l'aumentu de la incidencia de la pandemia de COVID-19. Nel casu del conceyu de la mariña, los epidemiólogos recomendaron activar esta midida preventiva pol crecimientu progresivu nes selmanes últimes de casos rexistraos perriba de la media del país.

Mentes, nel del oriente los espertos valoren la so situación de riesgu, yá que cuenta con una gran cantidá de población vulnerable al virus. Amás entámase un cribáu a tolos ponguetos y ponguetes, qu'entamó güei en San Xuan de Beleño con más de 250 vecinos convocaos, pa mañada siguir en Sellañu.

La midida va tener una vixencia de 14 díes y nun implica restricciones nueves, anque sí un aumentu de les midíes de prevención y proteición. N'alerta naranxa yá taben Llaviana, Samartín del Rei Aurelio y Llangréu, que van siguir una selmana más magar que la tendencia ye de descensu progresivu de la incidencia de la COVID-19.