Asturies vive otru día de cifres males de la COVID-19: 119 contaxos

Esti martes hai que llamentar un muerte nueva, la 357 dende l'entamu del andanciu.

Los datos de la COVID-19 n'Asturies dexaron 119 casos nuevos por coronavirus SARS-CoV-2 ayeri, que ponen el total de la serie en 6.118 al restar ún anterior por un positivu falsu. De los afeutaos nuevos ún tuvo que ser ingresáu, mentes que'l restu son asintomáticos o presenten síntomas leves de la enfermedá, que tán pasando aisllaos nos sos llares.

El Serviciu de Salú del Principáu d'Asturies fixó'l martes 3.669 pruebes PCR, polo que la tasa de positividá foi de 3,24 por cientu. Ésta siguen siendo inferior al 5 por cientu que marca la Organización Mundial de la Salú (OMS) como llende na que la pandemia empieza a tar descontrolada.

Na xornada vivióse una muerte nueva. Trátase d'una muyer de 97 años ensin rellación con centros residenciales sociosanitarios.

Anguaño hai na UCI 21 persones, les mesmes qu'ayeri, mentes qu'en planta hai 17 pacientes ingresaos más, lo que pon el total en 87.