Salú camuda los criterios d’entrada al 4+ y plantega’l pieslle del interior de llocales d’ociu nocherniegu

Llanes nun entra finalmente nel nivel d’alerta 4+. La Conseyería de Salú, dada la situación de la pandemia, decidió camudar los criterios d’entrada en riesgu estremu pa los conceyos de más de 10.000 habitantes, sumando a la condición de 3 díes con una incidencia superior a 325 el tener un nivel mediu d’ocupación hospitalaria y d'UCI.

“Enantes sabíamos qu’una incidencia de 300 casos cada 100.000 habitantes a 14 díes conllevaba tener una ocupación media o alta hospitalaria y d’UCI. Agora, como se ta amosando colos datos, podemos tener una tresmisión comunitaria mui alta y la ocupación hospitalaria y d’UCI tar baxa”, espuso Miguel Ángel Prieto, xefe d’Alertes y Emerxencies Sanitaries COVID-19.

Por esti motivu, y dada l’anunciada entrada de Llanes en 4+, a la que diben siguir otros munchos conceyos de siguir la evolución actual, Salú decide camudar los criterios p’afayalos a la situación epidemiolóxica del momentu. Asina, agora va ser necesario pa los conceyos de más de 10.000 habitantes amás de superar la incidencia acumulada de 325 el tener un nivel mediu d’ocupación hospitalaria y d’UCI, esto ye, un 5 y un 10 por cientu, de manera respeutiva, “que n’Asturies vendría a ser tener unos 150 ingresaos en cama convencional y unos 25 n’UCI”.

“Plantégase que sía una ferramienta más selectiva y que se pueda utilizar en situación d’altu riesgu en conceyos en concreto. Nun tien muncho sentíu tomar agora mesmu midíes en 4+ como enantes cuando la movilidá y la interactividá ye tan alta, pero sí, si hai una situación de gravedá de biltu, plantegar midíes de zarru perimetral o otres específiques”, añadió Rafael Cofiño, direutor xeneral de Salú Pública. Al respeuto, apuntó que “dalgunes de les midíes que quiciabes haya que tomar de forma urxente nos próximos díes” han de ser “pa toa Asturies”, como podría ser el zarru del interior del ociu nocherniegu.

Un 17,6 por cientu de positivos nel cribáu

María José Villanueva, coordinadora de Programes COVID, apuntó que cuasi 10.000 de los 110.000 persones nel tramu d’edá de 15 a 30 años, onde se concentren agora la mayor parte de los positivos, apuntárose hasta agora pa participar nel cribáu entamáu. Yá se conoz el resultáu de la prueba PCR de 2.685, con un 17,6 por cientu de casos detectaos, un total de 474.

Sobre los biltos, señaló qu’hai 4 venceyaos a eventos en llocales grandes zarraos, con 172 positivos y 526 contautos estrechos en cuarentena. En llocales zarraos ente collacios, 46 y 51, de manera respeutiva, y en viaxes en vehículos, 40 y 60, rescamplando Villanueva la dificultá esistente pa cortar les cadenes de tresmisión al tapar los contaxaos en munchos casos los contautos, “quiciabes por un mieu a que tengan que cumplir cuarentena si lo dicen”, y ser el númberu por persona mayor qu’en foles anteriores, “de 10, 15 o 20”.

Na semeya, Prieto, Cofiño y Villanueva.