Llanes, primer conceyu n'entrar nel 4+ nuevu

|
Llanes

L'alta incidencia y positividá lleven a Salú a decretar esti nivel d'alerta'l vienres, anque nun va haber más restricciones. El martes rexistráronse n'Asturies 389 casos nuevos.

L'alcalde Enrique Riestra y el conceyal de Turismu, Comerciu y Deporte, Iván García Álvarez, aconceyaron ayeri con responsables de la conseyería pa tratar la situación. Llanes tenía'l llunes una incidencia acumulada a 14 díes de 526,98 casos cada 100.000 habitantes y una tendencia que llevará a que cumpla les concidiones pa entrar nel nivel d'alerta 4+ el vienres: tener per trés díes una incidencia superior a 325 y una positividá alta.

Sicasí, dada la situación nueva creada pola vacunación y tar los contaxos centraos sobre manera en xente mozo, nun ta previsto la introducción de más restricciones o zarros perimetrales, como asocedía colos conceyos con riesgu estremu nel estáu d'alarma. Les estratexes previstes son el refuerciu de les midíes de proteición individual, la disminución de la interacción social nel grupu d'edá más afeutáu, la participación nel cribáu de persones de 15 a 30 años que tengan una sospecha de que tuviere en situación de riesgu de contaxu y el cumplimientu de la normativa vixente polos diferentes sectores, sobre manera n'espacios interiores d'establecimientos con más riesgu como los llocales d'ociu nocherniegu.

Dende'l Conceyu informóse que los datos pa entrar nel escenariu 4+ contabilícense en función de los empadronaos en Llanes, "unes 13.600 persones", y que solicitó a Salú que se contabilice "polo menos, les places d'agospiu que tien el conceyu (18.669) y que se tenga en cuenta el númberu de población de segundes residencies. Con estos datos podría aplicase otru porcentaxe, que s'asemeyaría más a la realidá".

Séptimu día ensin finaos

A falta de la espubización de la datos oficiales de la COVID-19, la conseyería informó de la detección ayeri de 389 casos –l'actualización auméntala hasta 398 por positivos non contabilizaos en díes previos–. Ye la cantidá más alta dende'l 5 de febreru, cuando hebo 412 –una revisión aumentó los casos a 416–, superando los 330 del vienres –342 finalmente–.

Fixéronse 3.523 pruebes de de diagnósticu d'infeición activa, polo que la tasa de positividá s'asitió nel 11,75 por cientu. A 7 díes, esti porcentaxe taba'l llunes nel 11,04 por cientu –ayeri xubió al 11,8 por cientu–.

La nota positiva ye l'ausencia de finaos per séptima xornada siguida. El total de perdes nel andanciu caltiénse en 1.981.

Hai 52 pacientes hospitalizados con confirmación o sospecha de COVID-19, a los qu'hai que sumar los 12 que tán na UCI. Son 2 y 1 menos que'l llunes, de manera respeutiva.

13 por cientu de positivos ente mozos

El cribáu entamáu por Salú pa tratar de controlar l'espardimientu del coronavirus SARS-CoV-2 ente la mocedá, con una incidencia de 1.038 casos, la más alta dende l'entamu de la pandemia, dexó un 13 por cientu de positivos hasta'l momentu. Más de 9.300 asturianos d'ente 15 y 30 años solicitaron facer la PCR.

Semeya propiedá del Conceyu de Llanes.

Contador Estadistiques