Ruma Barbero participa nos talleres de llectura n'asturianu de Villaviciosa

L'alcuentru céntrase na so novela gráfica 'Manzajú', I Premiu Alfonso Iglesias de cómic.

El Serviciu de Normalización Llingüística de la Comarca de la Sidra entama esta actividá qu'avera a los participantes del taller de llectura n'asturianu al autor del llibru que tán lleendo. Nesta ocasión el convidáu ye'l dibuxante Ruma Barbero, que va falar de la so obra 'Manzajú'.

Trátase de "una historia autobiográfica na que voi cuntando la mio toma de conciencia y consciencia de nenu por medio de saltos temporales. Al mesmu tiempu ye una reflexón de cómo les cultures pequeñes van quedando a cada vegada más amenorgaes a manes de les grandes", esplicó'l tamién músicu y integrante de Felpeyu nuna entrevista a Asturies.com nel 2010. L'alcuentru de Barbero colos llectores va celebrase a les 19 hores na Biblioteca Pública Municipal A. Balbín de Unquera.