Barbero: “Manzajú reflexa fechos que me descubrieron un país invisible”

Ruma Barbero (Xixón, 1971) ye ún de los dinamizadores del cómic asturianu. Ta acabantes de publicar “Manzajú”, historia qu’algamó’l premiu Alfonso Iglesias de cómic. Tamién desendolca’l so llabor musical en Felpeyu.

Manzajú ye la to última obra publicada, de mou xeneral ¿Qué se pue topar nella?
Ye una historia autobiográfica na que voi cuntando la mio toma de conciencia y consciencia de nenu por medio de saltos temporales. Al mesmu tiempu ye una reflexón de cómo les cultures pequeñes van quedando a cada vegada más amenorgaes a manes de les grandes.

Nella, reflexes la to infancia y mocedá ¿Cómo ves la infancia de los neños asturianos d’anguaño?
Paezme mui difícil ser neñu en 2010 cola cantidá d’información mal canalizao qu’hai. Los neños asturianos d’anguaño, crecen con unos referentes culturales que-yos queden mui llonxanos y nun ye fácil que-yos lleguen referentes propios.

Criase en Somió tamién da pa cuntar abondes histories...
Da pa cuntar munches más histories que les que salen en cómic, pero básicamente ta reflexáu l’espíritu imperante nel mio pueblu. Dos mundos bien diferenciaos, el de los aldeanos y el de los ricos. Llevo tola vida siendo invisible pa la xente de perres y d’otru llau aguantando coñes de los collacios del roxeríu por ser de Somió.

Tamién en Manzajú reflexes fechos que dempués reafirmaríen el to compromisu asturianista…
Sí, son fechos que me fixeron descubrir un país invisible, una realidá que nun tenía nada que ver cola cultura española que salía na tele o nos llibros de testu, pero que yera la que t’arrodiaba y a la que teníes d’esforzate’l doble si queríes tener accesu.
 
Falando más del cómic en xeneral, hai xente qu’entá piensa qu’esto ye namás una cosa pa guah.es ¿Qué necesita’l cómic pa normalizase socialmente y quitase de prexuicios?
Siguir faciendo les coses como tan faciéndose d’un tiempu a esta parte, abrise a tolos xéneros posibles p’asina algamar más llectores, siguir sorprendiendo y llegando a xente de toles edaes.

¿Novela gráfica o cómic?
Nel mundu del cómic hai munchu complexu d'arte menor y hai xente qu'usa'l términu "novela gráfica" pa dicir que lleen cómics intelectuales d'adultos, non tebeucos. Pero, si nun s'usa nesti sen, paezme un términu afayadizu, define bien lo que ye y ta dando munches allegríes nos últimos años con obres biográfiques, periodístiques o lliteraries de muncha calidá.

Formalmente, “Manzajú” respuende a delles característiques de lo que llamen “novela gráfica”: formatu llibru, suxetivismu autobiográficu, flash backs, diferentes tiempos narrativos, destinada a un públicu maduru… Hai un puntu que nun lu tengo tan claru, “estensión”, ¿un cómic de sesenta páxines ye una novela gráfica? Préstame más llamálu "tebéu llargu".

Yes ún de los dinamizadores del cómic asturianu; col pasu del tiempu ¿Cómo s’alcuentra anguaño esti xéneru n’Asturies?
Nun ye qu’haiga munches referencies anque sí salen coses interesantes de xemes en cuando.

Amás de tí tamién hai otros autores asturianos reconocíos y premiaos…
Hai una riestra d’autores interesantes Gaspar Meana, Alfonso Zapico, Isaac del Rivero, Javi Rodríguez…

Los medios de comunicación mayoritarios n’Asturies nun faen davezu un bon llabor informativu y de dar puxu a delles manifestaciones culturales propies ¿Pasa lo mesmo col cómic?
Pasa con tolo que nun tien que ver cola cultura de mases. Acceder a les manifestaciones culturales propies requier un esfuerzu intelectual que pocos medios de comunicación tán dispuestos a facer.

¿Y les instituciones públiques?
Fain delles coses, munches veces más forzaos polos pactos de gobiernu que por creyer nello y sobre too van a les coses de rellumón, al Niemeyerón, a La Llaboralona, al Jose Luis Morenón, ensin analizar el valir artísticu, namás el facese la semeya.

Una de les series tuyes más conocíes ye la de Los Aguarones ¿Qué ye d’ellos?
Ehí quedaron, paraos dende que dexé de trabayar col mio compañeru Son. Ye una pena porque teníemos un par d’histories llargues que valía la pena sacar, pero agora mesmo toi con ganes de facer coses mui diferentes.

Acabes d’editar Manzajú, pero ¿Tienes más idees en mente pa futures obres?
Sí, tengo media docena de proyectos, pero tovía nun tengo claro cual va ser el siguiente.

P’acabar, y falando d’otru arte nel que lleves bien de tiempu trabayando ¿Hai dalgunes novedaes rellacionaes con Felpeyu de les que pueas falar?
Tamos na fase de xuntar melodíes y decidir lletres, ye una fase mui prestosa y creativa. Amás, tamos planificando 2011, con dellos proyectos abiertos pa festeyar los 20 años del grupu.