RPA va estrenar en marzu’l programa d’entrevistes ‘Asturies 81:21’ sobre la historia de l’autonomía

40 años depués de l’aprobación del nuesu Estatutu un programa de RPA va facer un percorríu pel nacimientu y la historia de l’autonomía asturiana. Va ser al traviés d’entrevistes a persones protagonistes naquellos años y posteriores como Pedro de Silva, Antonio Trevín, Amelia Valcárcel o Xuan Xosé Sánchez Vicente, ente otros.

Inaciu Galán va conducir esti espaciu que va inaugurar l’historiador Faustino Zapico’l martes 1 de marzu, a les 23 hores, pa tratar per una hora los antecedentes de l’autonomía. Llueu van venir 23 programes más nos que se van tratar los fechos claves del procesu.

“L’espaciu va falar de los momentos más importantes, pasando pela preautonomía, la redacción y aprobación del Estatutu, l’asunción de competencies nueves, la puesta en marcha de servicios, el papel de los diferentes presidentes, les crisis económiques y polítiques, etc., col testimoniu y l’analís de los sos protagonistes nel ámbitu de los movimientos sociales, culturales o sindicales”, espliquen dende Cuatro Gotes, productora responable de ‘Asturies 81:21, la hora de l’autonomía’. “Busca conocenos meyor como pueblu, facer balance de cuarenta años y mirar hacia’l futuru de l’autonomía asturiana”, añaden sobre’l programa que va emitise siempre los martes a les 23 hores.

Amás de los citaos De Silva, Trevín, Valcárcel o Sánchez Vicente, tamién tán confirmaos María Victoria Escudero y Antonio Masip. Galán va facer les entrevistes y conducir un programa que cuenta con un equipu formáu por la historiadora Arantxa Margolles y l’investigador David Fernández como guionistes, la propia Margolles y Sergio Buelga nes llocuciones, Lluis Fanjul y Marcos SL na téunica y Jennifer Berrocal na producción.

Na semeya superior, Sánchez Vicente na grabación de la entrevista pal programa. Na inferior, el conductor Galán col ex presidente Trevín.