'Asturies 81:21' de RPA entrevista a Barbón

El presidente va falar, a entrugues d'Inaciu Galán, de Belarmino Tomás, les presidencies anteriores o la fallida reforma del Estatutu.

El programa d'esti martes de 'Asturies 81:21' (23 hores, RPA), espaciu centráu na historia de l'autonomía al cumplise 40 años de l'aprobación del Estatutu, entrevista a Adrián Barbón. Xunto al periodista xixonés el socialista conversa alredor de la historia de l’autonomía asturiana, precedentes como’l gobiernu de Belarmino Tomás, los llogros y cuestiones pendientes, la so valoración de les distintes presidencies, asina como delles cuestiones d’actualidá alredor de la fallida reforma estatutaria y el futuru del país.

La entrevista grabóse'l xueves na sala del Conseyu de Gobiernu del Palaciu de los Presidente y va emitise, amás d'esta nueche, el sábadu a les 13 hores. Tamién va tar disponible na estaya 'A la carta' de la web de RTPA.

17 programes

Dende la so estrena'l 1 de marzu, cola presencia de l'historiador Faustino Zapico, fixéronse 17 programes pelos que pasaron los ex presidentes Pedro de Silva, Juan Luis Rodríguez-Vigil o Antonio Trevín, asina como ex conseyeros y conseyeres como Amelia Varcárcel, Graciano Torre, Xicu Xabel García Valledor, María Victoria Escudor, Antonio Masip, y otros líderes políticos como la ex ministra María Luisa Carcedo, o los ex diputaos Xuan Xosé Sánchez Vicente y Gaspar Llamazares buscando percorrer tolos momentos de la nuesa autonomía. L'oxetivu de 'Asturies 81:21' ye "conocenos meyor como pueblu, facer balance de cuarenta años y mirar hacia’l futuru de l’autonomía asturiana".