Rodrigo Fernández Joglar presenta una terminoloxía musicolóxica de xéneros tradicionales pa TermAst

|
Rodrigo Fernández Joglar

‘Terminoloxía musicolóxica: xéneros musicales tradicionales asturianos’ ye’l nome de la decimoquinta propuesta de TermAst. El so autor ye Rodrigo Fernández Joglar, que recoyó dos centenares de términos pa emplegar nun contestu, el de les escueles de música tradicional, “nel que se nota cierta castellanización”.

Ésta foi la principal motivación que llevó a esti pedagogu y maestru de música tradicional, gaita asturiana, percusión y acordión diatónicu, a comenzar a trabayar na recopilación de pallabres pa la ellaboración d’esta propuesta terminolóxica enfocada a los enseñantes de música tradicional. Asina, al traviés d’entrevistes a xente del folclor y la consulta de llibros y trabayos espublizaos na rede, Fernández Joglar rexistró dos centenares de términos cola so correspondiente definición, como ‘acordión’, ‘habanera’, ‘llingüeta’ o ‘zanfoñeru’.

Esti trabayu ta disponible dende esta mañana en TermAst, iniciativa entamada nel 2009 pola Academia de la Llingua Asturiana con Softastur y el Colexu d’Inxenieros n’Informática del Principáu d’Asturies. El so oxetivu ye recoyer iniciatives individuales o grupales de propuestes terminolóxiques en campos de los que sían especialistes, dexando estes pallabres al serviciu de los profesionales y falantes, que podrán, o non, faceles propies y da-y usu. Darréu, será la institución académica la que dirá inxiriéndolos dientro de los sos calces normativos.

Semeya obra de Xuan Alonso.

Contador Estadistiques