Rodrigo Fernández Joglar: “La enseñanza de la música tradicional nun pue separtase del so contestu cultural”

Tres asoleyar nel 2011 una ‘Terminoloxía Educativa’, el pedagogu y maestru de gaita Rodrigo Fernández Joglar (Xixón, 1988) dedica la so segunda propuesta en TermAst a una estaya a la que lleva dedicándose profesionalmente dende’l 2012. Asina naz la ‘Terminoloxía musicolóxica: xéneros musicales tradicionales asturianos’, decimoquinta iniciativa.

¿Esiste una castellanización progresiva nes escueles de música tradicional?

Trátase d’un fenómenu enforma complexu. Na mio opinión ye dalgo que se vien dando a tolos niveles de la sociedá a consecuencia de la falta d’oficialidá del idioma. Sí ye cierto que nos últimos 20 años, que ye de los que yo pueo falar pola mio esperiencia personal, percíbese un menor nivel de compromisu llingüísticu a nivel de delles escueles de música tradicional. Esto pue debese quiciabes a la pretensión d’estremar les enseñances musicales d’otres manifestaciones culturales que puedan resultar ‘incómodes’ pa determinaos sectores de la sociedá, anque esto, al mio paecer, ye un erru. La enseñanza de la música tradicional asturiana nun pue separtase del so contestu cultural, la llingua, l’antropoloxía, la sociedá tradicional... Llendase a cuestiones puramente de técnica instrumental y teoría del solféu ye desnaturalizar el deprendimientu de los instrumentos tradicionales. Amás trátase d’instrumentos qu’en munchos casos, como la gaita o la percusión, cuenten con un pallabreru n’asturianu enforma bayurosu a nivel d’emplegu, repertoriu, materiales colos que se construyen…, que nun tien sentíu tratar de forma ayeno al idioma.

¿Por esti motivu vio necesariu presentar esta propuesta terminolóxica?

Yá tuvi la oportunidá de trabayar na propuesta de terminoloxía educativa va dellos años y prestábame siguir na estaya musical. Sobre la necesidá de facer el trabayu, yo creo que ye interesante al tratase d’una xera na que muncho vocabulariu caltién formes tradicionales y la presencia de neoloxismos ye baxa.

Ta enfocada namái a la música tradicional. ¿Podría ampliase a otros campos de la música?

Por supuestu. De fechu, esisten propuestes terminolóxiques musicales más xenerales en procesu d’ellaboración por otros compañeros.

¿Cómo se recibió esti pallabreru nes escueles de música tradicional?

Entá ye ceo pa sabelo porque ta recién presentáu, pero espero que seya d’ayuda p’aquelles persones que lu consulten nel desendolcu del so llabor.

¿Cuándo comenzó a trabayar nesta terminoloxía?

Entamé con ello en 2012, al poco de presentase la terminoloxía educativa.

¿Cuántos términos recueye?

Cuenta con unos 186 términos, anque el proyectu TermAst contempla dir faciendo actualizaciones que de xuru dirán faciendo crecer la propuesta nun futuru.

¿Qué fontes emplegó?

Les fontes foron diverses, dende llibros y otres publicaciones tanto físiques como dixitales, a entrevistes y programes de televisión rellacionaos cola cuestión, amás de consultar a diferentes persones del mundu de la música tradicional a la hora d’esclariar duldes so la definición de dellos términos.

¿Cuáles foron les dificultaes principales que foi atopando?

Yo diría que la principal dificultá ye qu’al tratase d’un vocabulariu venceyáu a la tradición oral, hai multitú de términos pa referise a una mesma cuestión y decatase por una única manera de nomar a delles coses ye enforma difícil. Sicasí, nun dexa de ser una propuesta personal, na que los términos recoyíos nun pretenden ser nin los que tengan que ser más emplegaos nin sentar nenguna cátedra pal so usu; ye una propuesta concreta d’una persona concreta

¿Qué supón TermAst pa la llingua asturiana?

TermAst ye un proyectu d’una importancia capital pa la vitalidá del idioma, pa ufrir soluciones n’asturianu pa tolos campos del saber y qu’aquelles persones qu’asina lo quieran puedan desendolcar el so llabor profesional en llingua asturiana.

¿Cree que debería recibir más puxu dende l’Alministración?

Dende llueu. Nun escaezamos que la xente que collabora nesti proyeutu facémoslo de forma altruista, mientres que n’otres comunidaes con llingua oficial el presupuestu pa esti tipu de proyectos supera’l millón d’euros.

¿Tamos viviendo un espoxigue de la música tradicional?

Sí, ta habiendo una nueva fornada de xente que s’avera a la música tradicional de toles edaes. Siempre esiste la percepción de que ye la xente mozo la que s’interesa por estes cuestiones y ye ciertu, pero cada vez son más les persones adultes, y tamién xubilaes, qu’entamen a tocar la gaita, el tambor o’l curdión porque enantes nun tuvieran ocasión de facelo.

¿Qué midíes habría que poner en marcha pa potenciala entovía más?

Na mio opinión tien de potenciase en delles estayes: nel ámbitu escolar, cola programación d’actividaes extraescolares pa la reciella; nel ámbitu televisivu, con programación de calidá sobre música tradicional; reforzar les programaciones culturales nos conceyos... Hai que crear conciencia na sociedá de la importancia de caltener les tradiciones y la manera de calteneles ye participando d’elles, seya como escolinos, como intérpretes o como públicu qu’asista a los eventos.