Rodríguez Medina gana’l Premiu Xosefa Xovellanos y Redondo Viado’l Máximo Fuertes Acevedo

Pablo Rodríguez Medina y Beatriz Redondo Viado completaron la nómina de ganadores de los Premios Lliterarios 2013. El de L’Entregu llevó’l XXXIV Xosefa Xovellanos de novela, mentes que la naveta ganó’l XIX Máximo Fuertes Acevedo d’ensayu.

‘Fame d’amor, determín de pasión’ ye’l nome de la novela pola que se decidió, por mayoría, el xuráu presidíu pola direutora xeneral de Política Llingüística, Ana Fueyo, y conformáu polos escritores Quique Faes –ganador de la edición anterior del gallardón–, Xuan Bello, Miguel Barrero y Lourdes Álvarez, amás de pola téunica en materia llingüística, María Esther Castro Manzano. “L’esfuerciu narrativu tan sólidu, l’ambición y l’oficiu, amás del usu acertáu de rexistros variaos” foi la razón que-yos llevó a decantiase por esti trabayu presentáu baxo’l nomatu de ‘Solombres de Casiano’, que resultó ser Rodríguez Medina, ganador ex aequo d’esti mesmu premiu nel añu 2001 cola obra ‘L’arna de San Atanás’.

Nacíu en San Andrés de Llinares nel 1978, esti llicenciáu en Filoloxía Hispánica y especialista en Filoloxía Asturiana pola Universidá d’Uviéu trátase d’un de los escritores meyor valoraos de la lliteratura asturiana actual. En novela, tien espublizaes les obres ‘Los paraísos perdíos’ (2000), ‘Ente semeyances’ (2001), ‘Les vueltes, toles vueltes’ (2002), ‘Los taraos’ (2003), ‘Perreríes’ (2007), ‘Vivir ensin probalo’ (2009), ‘Música d’amor en guerra’ (2009) y ‘Al aldu la memoria’ (2010). Mentes, en poesía asoleyó ‘Nel dialeutu del grisú’ (1999), ‘Tiempu d’esiliu y povisa ayeno’ (2001), ‘Los desconocedores del agua’ (2001), ‘El color de l’ausencia’ (2004), ‘Aires de mudanza’ (2007) y ‘La edá de los caminos’ (2009), a lo qu’hai que sumar les obres de teatru ‘Martema, historia d’una guerra, retratu d’unes culpes’ (2003), ‘Orbaya’ (2003), ‘Cantu de gaviotes’ (2006) y ‘El santu’ (2009). L’entreguín tamién cultivó la narrativa xuvenil coles obres ‘Nun blinquen ayalgues’ (2003), ‘Tapín de Picupáu’ (2006) y ‘Ello ye too la xente, que nun mos compriende’ (2008).

Un ensayu sobre les rellaciones ente’l poder y los medios de comunicación

La periodista Beatriz R. Viado resultó ganadora del XIX Premiu Máximo Fuertes Acevedo d’ensayu pol trabayu ‘Yá cuasi nunca lo facemos por amor. Conciencies mercenaries’, una obra “bien estructurada que se sirve de la llingua asturiana pa reflexonar sobre un tema relevante y d'actualidá, como ye'l de les rellaciones ente poder y medios de comunicación”. El xuráu, qu’escoyó la obra de l’autora naveta por unanimidá, tuvo conformáu polos escritores y investigadores Rafael Rodríguez Valdés, Cristóbal Ruitiña Testa, Lourdes Álvarez García, Hugo Cortina Fanjul y Marta Mori de Arriba, y por Fueyo, como presidenta.

Natural d’El Remediu (1976) y residente anguaño n’Inglaterra, Viado ye llicenciada en Ciencies de la Información pola Universidad Complutense de Madrid y en Filosofía pola UNED. Ex direutora del selmanariu n’asturianu ‘Les Noticies’, na so trayeutoria profesional tien trabayao y collaborao con revistes como ‘AtlánticaXXII’ o ‘Muyeres Ateyabana’, el periódicu Diagonal Asturies o la emisora Onda Cero Radio. Amás, espublizó dellos llibros, como’l destináu pa mozos y moces ‘Qué ye que ye’l Tercer Mundu. Un viaxe del centru a les periferies’ (2004) o l’ensayu documental ‘El país del silenciu’ (2007), esti último xunto con Vanessa Gutiérrez. Nel añu 2003, algamó’l  Premiu Enriqueta González Rubín de periodismu n'asturianu, otorgáu pol Gobiernu del Principáu d'Asturies, gracies al reportaxe ‘El campu asturianu, en víes d’estinción’ espublizáu en ‘Les Noticies’.

Con estos dos fallos, complétense los Premios Lliterarios 2013 qu’entrega la Conseyería d’Educación, Cultura y Deporte y que tienen una recompensa de 3.000 euros. Enantes, Marisa López Diz llevó’l VI Premiu María Xosefa Canellada de lliteratura infantil y xuvenil con ‘Tatuaxes nel corazón’, mentes que’l XIX Premiu Xuan María Acebal de poesía foi pa Ricardo Candás por ‘Superficie del silenciu’, y el V Premiu Alfonso Iglesias de cómic, p’Alfonso Zapico por ‘Cuadernos d’Ítaca’.

Na semeya, Rodríguez Medina na edición del 2012 de la Universidá Asturiana de Branu (UABRA).