Representantes de seis grupos parllamentarios van participar nun alderique sobre l’asturianu y la reforma del Estatutu

Álvaro Queipo, Adrián Pumares, Noelia Macías, Daniel Ripa, Ángela Vallina y Luis Armando Fernández Bartolomé aceptaron la invitación d’Iniciativa pol Asturianu pa participar nun alderique de títulu ‘L’asturianu énte la reforma del Estatutu: construyendo’l futuru del idioma’. Ésti va celebrase’l sábadu en Xixón y va poder siguise pela rede.

Tolos grupos parllamentarios van tar representaos nesta cita, cola esceición de VOX, única formación posicionada manifiestamente en contra de les llingües propies d’Asturies. El PP, Foro y Podemos, polos sos secretarios xenerales y parllamentarios, Queipo, Pumares y Ripa, de manera respeutiva, mentes que por parte socialista acude una diputada y miembru de la Executiva, Macías; por Asturies pela Izquierda (IX-IAS) la so vocera na Xunta Xeneral, Vallina; y por Ciudadanos, el diputáu Fernández Bartolomé.

Los seis van acudir el sábadu a un actu, con entamu previstu a les 11.30 hores na sala 2 de la Llaboral, que va ser n’esclusiva pa socios d’Iniciativa pol Asturianu, con preferencia d’accesu previu pidimientu de butaca, al tar l’aforu llendáu pa 30 persones por mor de les midíes de seguranza por cuenta la pandemia de COVID-19. L’alderique, que va afondar sobre l’asturianu y la reforma del Estatutu d’Autonomía que se va abrir, según la previsión del Gobiernu, nos meses últimos del añu, va emitise en direuto per Internet.

Calca nesti enllaz pa ver l'alderique en direuto.