“Habría de llegar a setiembre con una propuesta pautada polos partíos de lo que se quier facer”, apunta Llera

Iniciativa pol Asturianu propunxo, al final del alderique del sábadu, la creación d’una Mesa de Diálogu Social pa la Reforma del Estatus Llegal de les Llingües d’Asturies cola intención d’entainar el procesu hacia la oficialidá. El presidente, Iván Llera, considera que “habría de llegar a setiembre con una propuesta de lo que se quier facer”.

Diputaos de seis de los siete grupos de la Xunta Xeneral participaron nel alderique ‘L’asturianu énte la reforma del Estatutu: construyendo’l futuru del idioma’ que tuvo llugar la mañana del sábadu en Xixón, na sala 2 de la Llaboral. El secretariu xeneral del PP, Álvaro Queipo; el de Foro, Adrián Pumares; el de Podemos, Daniel Ripa; el coordinador d’Izquierda Xunida (IX), Ovidio Zapico –Ángela Vallina, la persona anunciada, nun pudo acudir por temes de salú–; la secretaria de Coordinación Territorial de Política Municipal de la FSA, Noelia Macías; y Luis Armando Fernández Bartolomé, de Ciudadanos, espresaron la so postura al respeuto de la cuestión y adericaron per dos hores y media.

“Tamos mui contentos pola participación de tolos diputaos, que punxeron dende’l primer momentu una mui bona disposición. Hebo alderique y intercambiu d’idees y cumplimos col oxetivu de que yá s’entame a falar d’esti tema y a conocer les postures de tolos partíos”, valoró Llera.

Inaciu Galán encargóse de moderar l’actu y, nel tramu final, de proponer a los diputaos l’entamu d’una Mesa de Diálogu Social pal Cambiu Llegal del Estatus Llegal de les Llingües d’Asturies, na que participen los partíos, la sociedá civil y el movimimientu de reivindicación llingüística, “con un primer conceyu n’alredor de 15 díes” y alcuentros nos meses de xunu y xunetu. “Habría de llegar a setiembre con una propuesta pautada polos partíos de lo que se quier facer”, considera Llera, que recuerda que “nun queremos sustituyir el trabayu de la Xunta Xeneral”, sinón apurrir ferramientes p’algamar el mayor consensu posible.

Esta demanda, saber lo que se va votar, foi la qu’espresaron los representantes del PP y de Ciudadanos, cola mirada de toles formaciones puestes na FSA como partíu qu’ha liderar el procesu. Tanto populares como socialistes comprometiéronse a tratar internamente la participación na Mesa de Diálogu Social, a la qu’amosaron la disposición de contribuyir Foro y IX, mentes que Podemos nun punxo torgues.

Un modelu propiu p’Asturies

Nel ampliu alderique ente los representantes de los partíos, éstos dexaron ver les sos postures al rodiu de la reforma del Estatutu y la oficialidá. Macías defendió “una oficialidá dialogada y consensuada” y dixo qu'hai que “empezar a trabayar nesi diálogu pa ver cuál ye'l modelu”, porque “va ser un modelu propiu. El modelu d'Asturies”.

En gallego-asturiano Queipo reconoció que-y gusta “munchísimu’l modelu gallegu d'oficialidá”, que cree que ye “l'encaxe perfeuto pal pueblu gallego”. P’Asturies, sicasí, cree que la “Llei d’Usu ye’l marcu perfeutu”.

“El nacionalismu ye'l problema númberu ún d'España como nación”, espresó Fernández Bartolomé, dalgo que venceyó a les diferentes oficialidaes. “¿Qué nacionalismu gobernó en Galicia y Valencia, que tienen mecanismos de proteición llingüística?”, entrugó darréu Daniel Ripa, qu’opina que lo primero ye blindar derechos na reforma del Estatutu d’Autonomía, pa “llueu avanzar el modelu d'oficialidá”.

Zapico, n’asturianu, citó a l’Academia de la Llingua Asturiana, “l'embrión sobre'l qu'algamar consensos al rodiu de la oficialidá”, y recordó que la llexislatura avanza y que "el modelu hai que definilo nos meses próximos". Pela so parte, Pumares, que s’espresó tamién en llingua asturiana, afirmó que “la forma de salvar la llingua asturiana ye usala”, y que l'actual marcu, la Llei d'Usu, nun garantiza esi derechu, como se pudo comprobar nos meses últimos na Xunta Xeneral o na Universidá d’Uviéu.

Na semeya, Pumares, Ripa, Queipo, Galán, Macías, Fernández Bartolomé y Zapico.