Repartu de puntos nel derbi, insuficiente pal Sporting pa certificar la permanencia en Segunda

Sergi Enrich adelantó a los azules de cabeza na primer parte, tantu que Djuka igualó de penalti gracies a una aición dientro de l'área protagonizada por él mesmu y revisada pol VAR.

Sporting y Uviéu protagonizaron un derbi descafeináu pola situación clasificatoria de los dos equipos; los azules con opciones remotes de play-off y los roxiblancos virtualmente salvaos con 1 puntu más, anque non matemáticamente. Arrancaron meyor, más intensos, los de Miguel Ángel Ramírez, téunicu que salió con un plantegamientu conservador con trés centrales, pero nel segundu tramu los futbolistes d'Álvaro Cervera empezaron a tomar el mandu y a llevar peligru peles bandes.

Foi nesti periodu cuando llegó'l gol visitante. Bretones, solu, tuvo tiempu pa mirar y poner un centru perfeutu a la zona de l'area onde taba Enrich, que remató de cabeza con ventaya frente a Bruno, dando-y una parábola al balón imposible pa Cuéllar.

Una vegada más l'Uviéu tomaba ventaya n'El Molinón, pero nesta ocasión el Sporting sería quien a anotar. Foi gracies a un penalti de sellu 'VAR' a la vuelta del vestuariu, una agarrada de Dani Calvo a Djuka que na sala VOR vieron punible.

Col cambiu de sistema, pasando a xugar con cuatro atrás, los roxiblancos dieron un pasu alantre, pero'l gran déficit d'esta temporada, la falta de remate, tornó a condenar al equipu. Los carbayones, mentes, llendáronse a defender, ensin conceder ocasiones al rival.

Pendientes del Málaga CF

La victoria del Málaga CF col Mirandés (2-0) impidió que'l Sporting pudiera dormir cola permanencia atada. El Málaga nun baxa los brazos, pero colos resultaos d'esta xornada namái-y queda una opción pa salvase: ganar los dos partíos y que los xixoneses pierdan los dos, superando amás el global (-6 y -2 agora, de manera respeutiva), y que l'Huesca sume un puntu pa evitar un triple empate que lu condenaría.

Al Sporting-y bastaría, mentes, con sumar un puntu el sábadu n'Eibar na xornada unificada (18.30 hores) pa nun depender de los andaluces, que visiten a un Alavés que se xuega l'ascensu direutu, y vese obligáu a evitar la derrota nun últimu partíu d'infartu n'El Molinón. La Ponferradina, equipu qu'ayeri baxó al empatar col Huesca (0-0) n'El Alcoraz, sería'l rival nel partíu final.