Reivindicación y folixa con motivu del Día de la Nación Asturiana

Esti xueves, 8 de setiembre, ye la celebración oficial del Día de la Nación Asturiana. La reivindicación y la folixa centren les actividaes previstes pa esta xornada en tol país. #LluchandoPolaSoberanía, Andecha Astur, el PAS, Podemos y Izquierda Xunida (IX) entamen actos, a los qu'hai que sumar los del Gobiernu en Taramundi.

Un añu más, la iniciativa #LluchandoPolaSoberanía pretende axuntar a tol nacionalismu nun actu común n'Uviéu. La cita ye a les 13 hores nel Paséu los Álamos, d'u va partir una manifestación baxo'l lema 'Ganar la cai faciendo país'. Nella ta anunciada la participación de la Corriente Sindical d'Izquierda (CSI), les Asamblees d'Estudiantes de la Universidá d'Uviéu, Disex Asturies, la Plataforma Antidesahucios d'Uviéu, la Ruta contra'l Racismu, Muyeres en Llucha de la CSI, Vecines escontra l'AVE, Darréu, Xunta Estudiantil Asturiana, el Llar La Llegra y Compromisu por Asturies, formación ésta que tamién sofita la Folixa Popular qu'entama Podemos nel Muséu del Pueblu d'Asturies.

Otra formación que tien anunciada la so presencia na manifestación d'Uviéu ye Andecha Astur, que tamién convoca un actu políticu a les 12.30 hores na plaza la Catedral. Con esta concentración, Andecha quier desixir la soberanía que "mos correspuende comu pueblu, que mos permita ser los auténticos protagonistes del nuesu presente y futuru", amás de reivindicar el socialismu comu "referente d’igualdá social y progresu".

Tres la marcha, que va finar a les 14 hores na Plaza La Corrada l'Obispu, onde va celebrase una xinta popular, van haber espaciu pa la música y los xuegos del país. "Un 8 de setiembre más tornamos a les cais les que creyemos nuna alternativa al discursu autocomplaciente y cuadonguista que se mos presenta pa esti día dende l’ámbitu institucional ", apunten dende #LluchandoPolaSoberanía, iniciativa que llama "a construyir y facenos respetar".

El PAS, en Xixón

Como vien siendo vezu, el Partíu Asturianista (PAS) va celebrar el 8 de setiembre na xixonesa Plaza'l Marqués, frente a la estatua de Pelayo, un homenaxe al "fundador del Reinu y Estáu d'Asturies". "Como queremos que sía un homenaxe abiertu a la ciudadanía, vamos facelo sólo cola bandera d'Asturies", espliquen dende la formación, que tien anunciáu l'actu pa les 13 hores.

Darréu, la militancia tien previsto celebrar una xinta de xeremandía.

Folixa Popular de Podemos nel Muséu del Pueblu d'Asturies

Al igual que nel 2015, Podemos Asturies y les candidatures de xunidá popular de la que forma parte, entamen una Folixa Popular nel Muséu del Pueblu d'Asturies. L'actividá ta previsto que comience al meudía pa, a lo llargo del día hasta les 22 hores, celebrar alderiques, xuegos infantiles, una xinta popular, un alcuentru municipalista y de mocedá, y conciertos, ente otros actividaes como una feria del llibru, del discu, ecolóxica y artesanía. Nel ámbitu políticu, destaquen les intervenciones d'Emilio León, voceru de Podemos Asturies na Xunta Xeneral; Daniel Ripa, secretariu xeneral de Podemos Asturies; Carolina Bescansa, secretaria d'Analís Políticu y Social de Podemos; Nagua Alba, secretaria xeneral de Podemos Euskadi; y Xavier Domènech, cabezaleru d'En Comú Podem.

No que respetua a les actuaciones musicales, hai que destacar la presencia de los gallegos Chotokoeu, amás de les formaciones llocales Cuchu y Lorena Álvarez y su Banda Municipal. Tamién va haber espaciu pa grupos de danza tradicional.

Alberto Garzón nel actu d'IX en Riosa

L'Hotel L'Angliru, en Villapará, va ser la sede del actu políticu d'IX con motivu del Día d'Asturies. Alberto Garzón acude per primer vegada a esta celebración como coordinador xeneral de la formación a nivel estatal, eventu que va principiar a les 13 hores y nel que tamién van intervenir Manuel González Orviz, coordinador d'IX Asturies, y Ana Díaz, alcaldesa de Riosa.

Chus Pedro va poner el toque musical a la cita, a la que va siguir una xinta de xeremandía de magar les 14.30 hores.

Taramundi acueye los actos llúdicos oficiales

El Gobiernu tresllada la celebración del Día d'Asturies a Taramundi, que va tar marcada pola cultura tradicional y popular asturianes. Yá na xornada previa al 8 de setiembre va haber actividaes, como l'apertura dende les 17 hores del Mercado Tradicional y Feira de Productos Asturianos y un conciertu de tonada a les 18.30 hores al que va siguir ún especial de Marisa Valle Roso xunto col Coro Minero de Turón (20 hores) y otru de Diego Cartón (22 hores).

Mañana'l programa va comenzar al meudía con deporte tradicional a cargu del Equipo Monte Areo nel Polideportivo Municipal de Taramundi y una preba de sidra y exhibición d'escanciáu na cai Empedrada. El teatru de cai (13 y 18 hores), protagonizáu por Adrián Conde y Tras la Puerta Títeres; l'amuesa de folclor asturianu cola Banda de Gaitas El Penedón (13.45 hores); otra exhibición de deporte tradicional, nesti casu col Equipo de Deportes Autóctonos de Perlora (17.30 hores); un concierto de tonada (16 hores); y l'actuación d'un quintentu de la OSPA col conciertu 'La música en tiempos de Cervantes' (13 hores), son dalgunos de los eventos del día.

Tejedor (18.30 hores) y Paula Rojo (20.30 hores) van encargase de poner el ramu a los festexos oficiales de Taramundi.

Comunicáu de Compromisu por Asturies

Compromisu por Asturies, formación que vien sofitando a Podemos dende los sos primeros pasos nel país, asoleyó un comunicáu con motivu del 8 de setiembre nel que fai un llamáu "a participar nos actos reivindicativos y festivos que s’entamen dende les candidatures d’unidá popular y dende colectivos soberanistes". Nél recuerda "la necesidá de qu’Asturies seya un marcu específicu d’acción política y un país con un proyectu propiu", pa lo que considera "más necesario que nunca nun zarrar puertes, sinón abriles y trabayar a comuña con persones de trayectoríes y ideoloxíes polítiques distintes, procedencies xeográfiques estremaes, o sensibilidaes culturales y llingüístiques diferentes, qu’asuman un marcu asturianu d’actuación, de pensamientu y de práxis política".

Por esti motivu, reafirma "l'apueste que fiximos nel so día nel sentíu de que Podemos Asturies, y les diferentes candidatures d’unidá popular, son los principales preseos de cambiu que tenemos al algame nesti momentu, y por ello son un ámbitu de trabayu políticu y social estratéxicu pa qu'Asturies tenga un proyectu y un discursu propiu na axenda política".

IAS nun celebra'l 8 de setiembre

Izquierda Asturiana (IAS), pela so parte, nun entama nengún actu pa esti 8 de setiembre conforme a la so postura de reivindicar el 25 de mayu, fecha de la declaración de soberanía de la Xunta Xeneral, como la xornada na que celebrar el Día de la Nación Asturiana.