La fiesta vivióse na cai

Cuadonga, Taramundi, Uviéu y Xixón centraron les actividaes convocaes con motivu del Día de la Nación Asturiana pol Gobiernu y por coleutivos y formaciones polítiques. Una xornada que los asturianos y asturianes vivieron na cai.

Javier Fernández, presidente del país, acudió pela mañana a los actos entamaos pol Arzobispáu d'Uviéu en Cuadonga con motivu del Día de la Santina, xunto col conseyeru de Presidencia y Participación Ciudadana, Guillermo Martínez. Nun acudieron a la celebración relixosa nengún cabezaleru de Podemos, Izquierda Xunida y Ciudadanos,  mentes que'l PP contó cola representación de Fernando Goñi y deel delegáu del Gobiernu estatal n'Asturies, Gabino de Lorenzo, y Foro, de Cristina Coto.

Yá de tarde, el líder de la FSA-PSOE acudió a los actos llúdicos entamaos pol so Gobiernu en Taramundi, que contó con gran participación de vecinos y de xente procedente de tolos puntos d'Asturies. Una gran cantidá d'actividaes a los llargo de la tarde del miércoles y tola xornada d'ayeri, ente los que destacaba'l Mercado Tradicional y Feira de Productos Asturianos, conformaron el programa. Los conciertos de Tejedor y Paula Rojo punxeron el ramu a la folixa.

Reinvidicación n'Uviéu

Alredor de 200 persones participaron na convocatoria 'Ganar la cai faciendo país' de #LluchandoPolaSoberanía n'Uviéu. A les 13.10 hores salía la marcha del Paséu los Álamos lluciendo decenes de banderes d'Asturies, una del País Lleonés y otres colloraes, moraes o del arcu la vieya. Nella dexábense ver pancartes la Plataforma Antidesahucios d'Uviéu, CSI Muyeres, la Ruta contra'l Racismu y Andecha Astur.

La temática social centró gran parte de les intervenciones que se sucedieron ente cada parada de la marcha hasta la plaza La Corrada l'Obispu: la Escandalera, l'edificiu históricu de la Universidá d'Uviéu, la plaza la Casa Conceyu y la cai Sol. En caúna d'elles, representantes de los coleutivos presentes na marcha falaron de la situación de la vivienda, la igualdá de xéneru, la universidá o los refuxaos, ente otros.

A les 14 hores los manifestantes aportaron al puntu final de la marcha, onde se lleó'l discursu de la manifestación por parte de la iniciativa #LluchandoPolaSoberanía y se celebró una xinta popular. Tamién pudo vese una esposición de fotografíes de Vecines escontra l'AVE y hebo música y xuegos del país.

Suelta de globos na plaza la Catedral

Media hora enantes del aniciu de la marcha, taba convocada na plaza la Catedral un actu políticu d'Andecha Astur. Ésti consistió nuna intervención política de Paulo Arboleya, que reivindicó qu'Andecha "ye la única organización política n'Asturies qu'entama un actu publicu reclamando esta fecha como’l Díi de la Nación Asturiana".

Darreú, los presentes asitiáronse nel centru de la plaza y fixeron una suelta de globos colos colores de l'asturina pa depués desplazase al Paséu de los Álamos a participar na marcha soberanista.

Charres y música nel Muséu del Pueblu d'Asturies

El Muséu del Pueblu d'Asturies acoyó la Folixa Popular entamada por Podemos y les candidatures de xunidá popular nes que participa. Munchu públicu acudió a lo llargo del día a la instalación asitiada a la oriella del ríu Piles pa disfrutar de charres y conciertos, destacando les intervenciones d'Emilio León, voceru de Podemos Asturies na Xunta Xeneral; Daniel Ripa, secretariu xeneral de Podemos Asturies; Carolina Bescansa, secretaria d'Analís Políticu y Social de Podemos; Nagua Alba, secretaria xeneral de Podemos Euskadi; y Xavier Domènech, cabezaleru d'En Comú Podem.

Homenaxe a Pelayo

El Partíu Asturianista (PAS) celebró con motivu del Día d'Asturies el so particular homenaxe a Pelayo como fundador de la patria, actu abiertu a tola ciudadanía que tuvo llugar frente a la estatuta del primer rei asturianu na xixonesa plaza'l Marqués. Darréu, los militantes de la formación celebraron una xinta.

Garzón en Riosa

Decenes de militantes d'Izquierda Xunida (IX) celebraron el Día d'Asturies en Villapará con una xinta. Enantes, celebróse un actu políticu cola presencia d'Alberto Garzón, coordinador estatal de la formación; Manuel González Orviz, coordinador d'IX Asturies; y Ana Díaz, alcaldesa de Riosa, a lo qu'hai que sumar una intervención musical de Chus Pedro.

La política estatal centró la intervención de Garzón, ufriendo a Pedro Sánchez la posibilidá de llegar a un alcuerdu programáticu de Gobiernu, mentes que González Orviz abogó por un alcuerdu presupuestariu ente la FSA-PSOE, Podemos y IX que pueda, inclusive, llegar más allá.

Na semeya, Fernández y  l'arzobispu Jesús Sanz nel actu de Cuadonga.