Récor nuevu de contaxos nuna xornada: 394

La tasa de positividá rexistrada na xornada del miércoles nel país algama'l 7,4 por cientu.

La Conseyería de Salú comunicó qu'ayeri se diagnosticaron 394 casos nuevos de la enfermedá causada pol coronavirus SARS-CoV-2, que nos datos oficiales de la COVID-19 son 402 al incorporar otros de díes anteriores. Ye la cantidá más alta del andanciu, superando los 381 del vienres.

Na xornada fixéronse 5.322 pruebes PCR, polo que la tasa de positividá asítase nun 7,4 por cientu, cuando dichu vienres foi del 9,87 por cientu. Esta cifra sigue siendo mayor del 5 por cientu que marca la Organización Mundial de la Salú (OMS) como llende pa tener controlada la pandemia.

Hai que llamentar la perda de 7 persones: cuatro muyeres de 98, 93, 88 y 82 años y trés homes de 93, 76 y 72. A les cifres oficiales súmense una muerte más de xornaes anteriores que ponen el total de finaos en 433.