Rajoy refuga dimitir y afronta la moción de censura col temor de la postura final del EAJ-PNV

El xueves, a les 9 hores, va comenzar l’alderique sobre la moción de censura al Gobiernu estatal presentada pol PSOE de Pedro Sánchez. Mariano Rajoy refugó otra vegada dimitir nuna sesión de control celebrada esti miércoles nel Congresu onde los populares amosaron nerviosismu pola postura que pueda adoptar l’EAJ-PNV.

Sánchez, candidatu que propón la moción de censura, cuenta col apoyu de Xuníos Podemos y les confluencies, Compromís y Nueva Canarias, y yá se da por seguru’l sofitu de los nacionalistes catalanes. Había series duldes sobre la postura del EAJ-PNV, que ta acabante de dar el so apoyu a los Presupuestos Xenerales del Estáu del Partido Popular (PP), pero lo cierto ye qu’esisten contautos ente socialistes y vascos, que güei nun descartaron dar el pasu d’echar del Executivu a Rajoy.

Los votos de los cinco diputaos del EAJ-PNV son claves pa sobrepasar la barrera de los 176 diputaos que fadría prosperar la moción de censura. Por ello Rajoy nun pudo ocultar güei na Cámara Baxa’l so nerviosismu y faló de “chantaxe” del PSOE.

Ábalos va presentala

El socialista José Luis Ábalos va encargase de defender la moción de censura mañana nel Congresu, pa lo que nun va tener llende de tiempu, cola posibilidá del Executivu de tomar la pallabra en cualquier momentu. Darréu, va intervenir el candidatu Sánchez, tamién ensin un tiempu prefixáu, pa presentar el so programa de gobiernu.

Los siguientes en falar son los representantes de los diferentes grupos parllamentarios, que van tener 30 minutos caún y una segunda intervención de 10, n’orde de menor a mayor representación, con posibilidá de respuesta pa Sánchez. Tres finar tolos turnos de pallabra, la presidenta del Congresu, Ana Pastor, va anunciar la hora de la votación, que previsiblemente tendra llugar el vienres.