PSOE y Ideas valten la ordenanza d’usu del asturianu presentada por Conceyu Abiertu por Noreña

El gobiernu de Noreña del socialista César Movilla amosó otra vuelta la so falta de respetu a los derechos llingüísticos al refugar la ordenanza d’usu del asturianu nel conceyu. Ésta foi presentada por Pablo Pérez, edil de Conceyu Abiertu.
 
La formación nacionalista trabayó per dellos meses nesta norma que “reconocería los derechos llingüísticos de tolos vecinos y vecines, regularía la utilización nel Ayuntamientu y dalgunes midides de promoción y normalización”, y presentóla en mayu a tolos grupos municipales pal so estudiu previu enantes de ser votada nel Plenu d’ayeri. Pero la ordenanza, que venía a dignificar la llingua y cultura asturianes, nun consiguió salir alantre pola oposición del gobiernu municipal, formáu pol PSOE (4 conceyales) y Ideas (1). Namái l’edil de Frente de la Izquierda apoyó la propuesta de Conceyu Abiertu por Noreña, mentes qu’Independientes por Noreña (3) y PP (2), astuviéronse. Inaciu Iglesias, conceyal por Foro Asturias Ciudadano, nun pudo acudir al Plenu.
 
“La postura del PSOE ye una sinrazón. Vinieron a dicir que la ordenanza yera ‘illegal’, que’l Conceyu nun tenía competencies pa poder aprobala. Tamién que tenía un coste de 50.000 euros, cuando eso nun ye asina”, afirma Pérez que, como nota positiva, destaca “la crítica constructiva de la oposición”. L’edil nacionalista diz tar especialmente ablucáu pola posición que mantién l’alcalde, qu’inclusive llegó a interrumpir la so presentación pa comunica-y que-y costaba siguila por facela n’asturianu. Por educación, Pérez continuó cola intervención en llingua castellana.
 
Tres el refugu del Plenu, la intención de Conceyu Abiertu por Noreña ye la “de siguir trabayando pa garantizar el derechu d’usar l’asturianu na Casa Conceyu”, asegura Pérez. Pa ello, espera poder sacar alantre una ordenanza similar a la de Xixón que pretende consensuar colos portavoces de los grupos de la oposición y llevala al Plenu al traviés de la vía d’urxencia, métodu que vienen utilizando estes formaciones ante la postura dictatorial de Movilla.
 
El votu d’Unai Díaz Noval y de la edil d’Ideas
 
De la votación del Plenu d’ayeri tamién hai que destacar la hipocresía de dos de los cinco conceyales que votaron en contra de la ordenanza d’usu del asturianu. Asina, Unai Díaz Noval, secretariu xeneral de Juventudes Socialistas de Asturias (JSA), formación qu’aprobó la fin de selmana pasada la inclusión de la oficialidá como ún de los sos oxetivos, decidió ser obediente y nun rompió la disciplina de votu. Mentes, la única edil d’Independientes de Asturias (Ideas), María Belén Junquera, tamién s’opunxo a la propuesta de Conceyu Abiertu por Noreña pese a que’l so partíu incluyó la oficialidá del idioma del país nel so programa eleutoral.       
 
Iniciativa pol Asturianu asoleyó güei un comunicáu nel que llamenta’l refugu del Plenu a la ordenanza y nel que critica la postura d’Ideas y del secretariu xeneral de JSA. Otra manera, considera positivo “la disponibilidá de tolos grupos, menos el PSOE, a aprobar unes ordenances pal usu del asturianu”, y afala a toles formaciones “a ponese al llabor pa consensuar un testu y aprobalu lo primero posible”.