El Plenu de Noreña vota les ordenances d'usu del asturianu

Esti xueves, a les 19 hores, va celebrase na Casa Conceyu de Noreña un Plenu nel que, ente otros asuntos, va votase la ordenanza d'usu del asturianu que presentó Conceyu Abiertu. Ésta saldrá alantre colos votos d'Independientes por Noreña (IPÑ), Foro y Izquierda Xunida (IX), cola dulda de la postura que caltendrán PSOE y PP.

Lo dos conceyales de Conceyu Abiertu por Noreña, Pablo Pérez Fonseca y Antonio Martínez Fernández, presentaron el pasáu 4 de marzu nel Rexistru Municipal la propuesta de la candidatura de xunidá popular pa unes 'Ordenances municipales pal usu de la llingua asturiana nel conceyu de Noreña'. Ésta yera la segunda ocasión na qu'esta formación proponía una serie de midíes p'asegurar la efectividá de los derechos llingüísticos que la llexislación otorga a los ciudadanos, pero na anterior, nel 2012, con Pérez Fonseca como edil únicu nacionalista, atopó la oposición del PSOE y de la conceyala d'Independientes de Asturia (Ideas), partíu qu'incluyera la oficialidá del asturianu nel so programa eleutoral.

Nesta ocasión, con otru color políticu en Noreña, la situación va camudar y les ordenances van salir alantre. Na comisión informativa celebrada'l miércoles pasáu, el documentu de Conceyu Abiertu por Noreña algamó, tres un llargu alderique de dos hores, l'apoyu del grupu del equipu de gobiernu d'IPÑ y Foro, amás d'Izquierda Xunida (IX). Mentes, el PSOE y el PP astuviéronse.

Na semeya, Pérez Fonseca y Martínez Fernández nel momentu de presentar la propuesta d'ordenances nel Rexistru Municipal.