“Pretender que llevar la contraria a la secretaria d’Organización supón ‘agresividá’ ye cuestionable”, alega Elipe

L’espediente que recibió Xune Elipe, presentáu como ‘Preinforme Expediente Ref: Ast-01’, acusa al númberu 2 de la llista de Podemos a les eleiciones del 28-M y a la candidata Covadonga Tomé de tener “les conductes más agresives” nos dos conceyos coles denunciantes Olaya Suárez y Alba González Sanz. L’avilesín presentó alegaciones al mesmu nes qu’afirma que “pretender que llevar la contraria a la secretaria d’Organización supón ‘agresividá’ ye cuestionable”.

Ésta ye la única acusación contra Elipe nun documentu que, consideren, podría llevar a una posterior inhabilitación y, nel casu de los ganadores de les primaria a liderar la candidatura y el cuerpu de la llista, a ser espulsaos de la llista. L’espediente tamién señala a Jara Cosculluela, ex responsable de Feminismos de Podemos Asturies, y Rubén Rosón, conceyal de Somos Uviéu.

Dividíu en trés partes, antecedentes, dilixencies prauticaes y fechos constataos, nésta última el ‘Comité de Seguridad y Salud Laboral’, depués de les entrevistes feches –“la comisión investigadora treslládase a Xixón pa entrevistase coles persones investigaes, ensin que se presente nenguna, alegando toes elles esautamente la mesma escusa xenérica”, apunta’l documentu, polo que namái se basa na versión de les denunciantes y na visión de Rafael Palacios y Ana Taboada, presentes nos conceyos–, conclúi que “hai un nidiu patrón d’agresividá qu’escede la confrontación política, apuntando direutamente a Tomé y escluyendo a Laura Tuero, númberu 3 y tamién crítica cola direción de Podemos, de la que diz que “a pesar del enfrentamientu políticu, caltién un tratu afayadizu”.

Sigue apuntando que “l’aición intimidatoria y de desgaste ye dirixida y planificada” buscando “la inhabilitación de la direición actual del partíu n’Asturies” y fina señalando esi comportamientu más agresivu nes xuntes de Tomé y Elipe. Tamién acusa a Daniel Ripa y Andrés Fernández Vilanova ‘Ron’, xunto a Rosón y Cosculluela, y el so entornu, d’acosar per diferentes víes, como redes sociales o aplicaciones de mensaxería instantánea, a les denunciantes.

Na nueche del llunes Elipe presentó un escritu d’alegación al espediente d’investigación nel que recuerda que “nun soi trabayor de Podemos” y entama señalando que “desconozo quién ta dirixéndose dende la organización a la mio cuenta de corréu electrónicu, ensin identificación dalguna, más allá d’un supuestu ‘Comité de Seguridad y Salud Laboral’ de Podemos, polo que desconozco con quién toi falando y por qué”. Darréu añade que “nun s’entiende que dende Podemos s’autorice qu’un nomáu ‘Comité de Salud Laboral’ se dirixa a los sos afiliaos y afiliaes, ensin esplicación dalguna del motivu pol que son requeríos y pretenda que se sometan a una entrevista”, al tiempu qu’argumenta que la non comparecencia a la mesma “debióse a la premura de tiempu col que se me notificó, teniendo el día previstu pa ella obligaciones de tipu llaboral inaplazables”.

Rellatu de los dos conceyos

Sobre los dos conceyos nos que se-y acusa de caltener una de “les conductes más agresives” comenta que “l’únicu contautu que tengo con AGS –como se refier a Alba González Sanz el documentu– produzse na xunta a la que fai referencia l’espediente, un alcuentru d’una hora y media ente la Direición y la candidatura”, na que tamién tan presentes Suárez, Palacios y Tabodada. “Nella tengo una pequeña intervención (non más de 7-8 minutos) na que manifiesto los mios puntos de vista sobre la situación d’enfrentamientu que se ta produciendo en Podemos Asturies”, rellata Elipe.

“AGS dizme que respeta’l mio llabor ‘como referente n’Asturies y la to capacidá inteleutual’, a lo que yo le respuendo que ‘paezme mui bien, pero como candidatu nun me siento respetáu’; n’otru momento interpélola comentando que ‘esti tema va más allá d’estatutos, regles, artículos, normas…, y que nun requier una respuesta burocrática, sinón política’, a lo qu’ella me respuende que ‘lo siento muncho, pero ye que yo soy mui decimonónica’”, esplica. “Con OSF –Olaya Suárez Fernández– nun tuvi práuticamente intercambiu de pallabres en tol aconceyamientu” que define como “un alcuentru tensu por entrambes, repito por entrambes, partes, pero que trescurrió por calces educaos y de respetu, ensin producise episodios d’agresión verbal nin nada que se-y paeza”, añade.

Al segundu conceyu “nun asiste AGS, pero sí OSF”, y Elipe apunta que “nun tengo interpelación nengunda nin conversación con esta última, llevando’l peso del alcuentru RPG –Rafael Palacios García–”. “Éstos son los únicos momentos nos que tuvi rellación coles denunciantes, persones a les que nun conocía anteriormente, polo que realizar acusaciones tan graves como les que se m’imputen resulten inxustificaes dafechu y pretender que llevar la contraria a la secretaria de Organización supone ‘agresividad’ ye, cuanto menos, cuestionable”, denuncia.

Añade amás que “nun s’aporta nengún tipu de prueba nin evidencia que lo demuestre”, polo que “ye la so pallabra contra la mía”. “Ye evidente que nun tamos énte un asuntu de seguridá y salú llaboral, sinón políticu”, considera Elipe, que, depués d’esponer una llarga defensa de la so persona y trayeutoria, solicita “l’archivo del espediente y el so pieslle definitivu, amás de toles actuaciones que se tán faciendo contra la mio persona coles que se pretende alteriar los resultaos de les primaries en Podemos Asturies de Payares/2022 y espulsar de la llista a los escoyíos pola Asamblea Ciudadana: Covadonga Tomé, Xune Elipe, Laura Tuero y Jorge Fernández”.

Na semeya, militantes sofiten a Tomé, Elipe, Tuero y Fernández na tarde d'ayeri frente a la sede de Podemos n'Uviéu.