Podemos abre un espediente a Xune Elipe: “Ye una inxusticia, siento tristura y rabia, pero dieron en duru”

Un comité de ‘Seguridad y Salud Laboral’ de Podemos abrió un espediente a Xune Elipe, númberu 2 de la llista de la formación a la Xunta Xeneral, llueu d’una denuncia d'Olaya Suárez, candidata del partíu en Xixón, y Alba González Sanz. “Ye una inxusticia, siento tristura y rabia, pero toi con ganes d’aguantar y resistir. Dieron en duru”, señala l’avilesín, que va presentar alegaciones esti mesmu llunes.

Foi’l miércoles, sobre les 21 hores, cuando Elipe recibió la notificación del espediente, al empar que Rubén Rosón, conceyal de Somos Uviéu, y Jara Cosculluela, ex responsable de Feminismos de Podemos Asturies. “Llega d’un órganu ‘pantasmagóricu’ nomáu ‘Comité de Seguridad y Salud Laboral’, ensin firma nin identificación nenguna; tampoco nun reflexa quién lu forma”, esplica’l de Villalegre.

Lo único que conoz son les denunciantes, Suárez y González Sanz, dimitida secretaria d'Organización. “Faise en base a dos conceyos que tuvimos, de calter priváu ente la candidatura y la direición, nes qu’estes dos persones aleguen que llevé la contraria al aparatu del partíu. Nun hai pruebes. Ye la so pallabra contra la mía”, apunta.

Hasta esta medianueche tien pa presentar alegaciones, lo que va facer nestes próximes hores. “Apunto que nun reconozo a esti comité. ¿Quién firma l’espediente? ¿Por qué? Tamién que yo nunca tuvi nengún tipu de rellación llaboral con Podemos”, espresa al tiempu qu’asegura que se reserva la posibilidá de dir a la xusticia ordinaria “si veo una difamación hacia la mio persona o qu’atenten contra la mio imaxe”.

Elipe, persona más votada, con muncha diferencia, del cuerpu de llista nes primaries de Podemos, lo que-y dio derechu a ocupar el númberu 2 de la candidatura que lidera Cova Tomé, ganadora de les primaries a la propia González Sanz, considera “una inxusticia” la situación que ta viviendo, más cuando la so postura foi la de nun entrar en nengún tipu de polémica, temiendo que l’espediente lleve a la so inhabilitación y espulsión de la llista, mesma situación que vive'l númberu 4, Jorge Fernández Iglesias. “Sientro tristura y rabia, pero toi con ganes d’aguantar y resistir. Dieron en duru”, afirma’l de Villalegre.

Apoyu del asturianismu cultural y social

Amás del sofitu de la militancia de Podemos nes primaries, Elipe recibió recién el d’un piñu de persones del asturianismu cultural y social. Más de mediu centenar robló un manifiestu baxo’l lema ‘L’asturianismu a la Xunta Xeneral’ que señala que “creemos qu’una voz asturianista ye más necesaria que nunca na coyuntura política nueva que va dase na próxima llexislatura; poro, un perfil como’l de Xune Elipe puede ser un revulsivu que dinamice y lleve esa sensibilidá a la Xunta Xeneral”.

Na imaxe, Elipe nun actu celebráu'l sábadu n'Uviéu. Semeya del Facebook de Cova Tomé.