Preséntense n'Uviéu les ediciones de les obres ganadores de los Premios Asturies Moza 2018

Diego Solís llevó'l de poesía col poemariu billingüe 'Cállanos con esa música'.

La Biblioteca d'Asturies Ramón Pérez de Ayala acueye esta tarde, a les 19.30 hores, la presentación de les ediciones de les obres ganadores de los Premios Asturies Moza 2018, asoleyaes por Impronta dientro la coleición Texu. Los vencedores d'esta edición son, amás de Solís, Noelia Alfonso en narrativa con 'Alas de musgo' y Sergio Granda en testos teatrales con 'El cuarto de invitados'.

Según destaquen dende la editorial, "'Cállanos con esa música' ye un llibru distintu a los anteriores del autor, onde los poemes nun traten de conformar una estructura, sinón que son les composiciones d’un momentu puntual y crucial que dan pie a una poesía crítica y reflexiva pa col propiu llinguax y la propia poética". Solís entemez na obra poemes n'asturianu y castellanu, con "dalgunos clásicos que se reinterpreten y distintos enfoques críticos que rematen nuna búsqueda de la conexón pa cola tierra, cola paz interior: esa música que debía callanos y dacuando, por suerte, consíguelo".