Galán solicita una categoría d'obres n'asturianu nos Premios Asturies Moza

La direutora xeneral del Institutu Asturianu de la Muyer y Polítiques de Mocedá, Almudena Cueto, apunta que lo ve "complicao" y propón un gallardón mozu nos Premios Lliterarios.

Inaciu Galán encargóse esti miércoles d'introducir el llibru billingüe 'Cállanos con esa música' de Diego Solís, Premiu Asturies Moza de poesía 2018, nel actu que daba a conocer les ediciones de les obres ganadores de les trés estayes nes que se divide'l gallardón. El periodista y escritor aprovechó la ocasión "pa facer públiques dos pidimientos de les que dexé constancia nel acta del premiu".

La primera foi "qu’estos premios habríen tener una categoría pa obres n’asturianu, diferente a la d’obres en castellán. Esto diba permitir dar una mayor visibilidá a la lliteratura asturiana y afalar la creatividá n’asturianu. Nun se pue facer competir a una llingua minorizada y non oficial, de momentu, con otra dominante, porque tamos favoreciéndo que s’escriba y se presenten obres na dominante".

D'igual forma, destacó que "é tamén importantequ’as obras en gallego-asturiano podan presentarse a este premio, y qu’esto quede recoyido nas bases da convocatoria. Temos qu’avezarnos a que seña el normal esta convencia das llinguas d’Asturias, con normalidá. Xa pedín tamén esto y quedó recoyido n’acta".

Cueto, na so intervención, recoyó'l guante de Galán no que se refier a esti segundu pidimientu, pero echó balones fuera con respeuto a la creación d'una categoría específica pal asturianu nos Premios Asturies Mozo. "Hai dos departamentos distintos con partíes presupuestaries" diferentes, alegó, pa depués ufrise "a falar con Padilla pa que ponga nos premios n'asturianu un premiu mozu, que tamién podría ser".

Convivencia de dambes llingües

Galán finó'l so discursu apuntando que "espero tamién que teamos cerca, dempués d’esti domingu qu’entra, de da-y solución llegal a la convivencia de llingües con desigualdá de drechos pa los y les sos falantes, al traviés de la oficialidá. Y paezme qu’esti poemariu de Diego Solís, nel que conviven poemes n’asturianu y castellán, ye símbolu d’esti tiempu que vien, de respetu mutuu ente falantes y d’arrequecimientu de la sociedá por esta diversidá llingüística que tenemos n’Asturies".

Na semeya, Galán, Solís, Cueto y Noelia Alfonso, ganadora de la estaya de narrativa con 'Alas de musgo', nun momentu del actu celebráu na Biblioteca d'Asturies Ramón Pérez de Ayala.