Preséntase la encuesta sobre la diversidá llingüística fecha en Xixón nel 2017

Ramón d'Andrés y Miguel Rodríguez Monteavaro son los autores d'esti estudiu qu'asoleya Trabe.

'La diversidá llingüística d'España y d'Asturies. Encuesta na ciudá de Xixón, 2017' ye'l títulu d'esta investigación encuadrada na socioloxía llingüística entamada gracies a una aportación del Conceyu y editada gracies a la financiación de la Universidá d’Uviéu pol so programa d’Ayudes pal Caltenimientu d’Actividaes d’Investigación de Grupos d’Investigación Reconocíos 2021. L'oxetivu de la mesma yera "conocer cómo los falantes del ámbitu urbanu del conceyu de Xixón perciben l’entornu llingüísticu español, asturianu y xixonés, y a ellos mesmos como falantes dientro d’esi entornu, garrando les siguientes referencies: llingües y dialectos; glotodiversidá d’España; el castellanu; y glotodiversidá d’Asturies".

Pa ello los responsables fixeron a los encuestaos "una mena d’'exame sobre cuestiones glotolóxiques o estrictamente llingüístiques, d’acuerdu coles percepciones o concepciones que los informantes tienen d’elles". "D’esta miente, resultarán coincidencies o incoincidencies ente’l saber científicu y el saber popular. Mentes que’l saber científicu s’establez d’acuerdu a criterios propios y autónomos de la llingüística, el saber popular sobre les mesmes materies establezse d’acuerdu con criterios mui heteroxéneos onde xueguen siempre un papel importante factores de tipu sociolóxicu, cultural, identitariu, ideolóxicu o políticu", espliquen.

La presentación del trabayu va tener llugar esta tarde, a les 20 hores, na llibrería xixonesa La Buena Letra. Xunto con D'Andrés y Rodríguez Monteavaro, miembros entrambos del grupu d’investigación universitariu Seminariu de Filoloxía Asturiana, va tar Esther Prieto, de Trabe.

Na imaxe, cubierta y ún de los gráficos de la encuesta.