Pola va tomar esti miércoles posesión como conseyeru d’Emplegu, Industria y Turismu

Seis díes depués de dase a conocer la dimisión de Francisco Blanco como conseyeru d’Emplegu, Industria y Turismu, Isaac Pola va tomar posesión del cargu nun actu previu a la reunión del Conseyu de Gobiernu. L’uvieín yera hasta la fecha direutor xeneral de Minería y Enerxía, puestu qu'ocupó tamién n'otres dos llexislatures.

El Boletín Oficial del Principáu d’Asturies (BOPA) publicó ayeri’l cese de Blanco como conseyeru y el de Pola como direutor xeneral, asina como’l so nomamientu como responsable nuevu d’Emplegu, Industria y Turismu. El socialista yá ta trabayando nel diseñu del so equipu pa encarar les sos responsabilidaes actuales na conseyería.

Doctor inxenieru de Mines pola Universidá d’Uviéu, Pola (Uviéu, 1963) tien una esperiencia amplia en xestión. Na llexislatura pasada yá tuvo al mandu de la Direición Xeneral de Minería y Enerxía, un cargu qu’exerció tamién ente’l 2007 y el 2011.