Podemos plantega una mayoría reforciada menor de los trés quintos o la incorporación d’una disposición transitoria na propia reforma

Una vegada recibíu l’informe xurídicu, encargáu a Miguel Ángel Presno, sobre la esixencia de los trés quintos de Foro p’aprobar la Llei de Normalización que desendolque la oficialidá, Podemos plantega al restu de fuercies una mayoría absoluta o la incoporación d’una disposición transitoria. La formación caltién qu’esta cuestión nun va ser obstáculu.

“La primer fórmula de desbloquéu, atendiendo a les recomendaciones del informe xurídicu, sería buscar una mayoría reforciada menor, una mayoría absoluta habitual pa estes lleis, pa nun poner nuna situación esceicional al asturianu”, esplicó Daniel Ripa, diputáu y secretariu xeneral del partíu. Nel casu de nun ser aceptada, la segunda propuesta ye “la incorporación d’una disposición transitoria que garantice los derechos hasta l’aprobación la llei de desendolcu”, esto ye, que “aquelles partes que seríen susceptibles de llegar a los tribunales se recoyeren de dalguna manera nel Estatutu d’Autonomía”.

Presno, en dichu informe, entituláu 'Sobre la exigencia –y eventuales consecuencias– de una mayoría de tres quintos para la aprobación de la ley de desarrollo de la cooficialidad lingüística en Asturias', analiza en primer llugar les mayoríes previstes nel Estatutu y nel Reglamentu de la Xunta Xeneral, valora depués si pue imponese una mayoría más cualificada pa dicha llei que pa otres normes y estudia qué efeutos produciría una declaración d’oficialidá ensin el desarrollu llexislativu posterior. El caderalgu de Derechu Constitucional de la Universidá d’Uviéu esplica que la esixencia de los trés quintos sería “una esceición dientro de les esceiciones a la mayoría simple”, pero en tou casu constitucional.

La oficialidá por sí mesma xeneraría’l derechu a poder dirixise a cualquier de les Alministraciones Públiques n’asturianu y gallego-asturiano pero, ensin llei de desendolcu, llevaría a una xudicialización del procesu pa que sían los tribunales “los que, en llugar del llexislador autonómicu llamáu a facelo, garanticen la eficacia de la declaración estatutaria”. Nesi sen, pa evitar esta situación, “podría incluyise na propia reforma del Estatutu d’Autonomía p’Asturies una disposición
transitoria na que, de dalguna manera, se concretasen, mientres nun s’aprobara la llei de la cooficialid, facultaes específiques de la ciudadanía n’orde al exerciciu de los derechos llingüísticos”, esplica.

Xineru, mes tope

“Hai que dexar claro, en cualquier casu, que Podemos Asturies nun va ser un problema nel desendolcu de la oficialidá y nel del Estatutu d’Autonomía. Plantegamos estes dos midíes pa que les valoren”, confirmó Ripa, que yá treslladó’l documentu al restu de fuercies en negociación cola intención de torgar que se dilate más nel tiempu la reforma. “Xineru sería’l plazu límite pa llegar a una tramitación que s’apruebe nesta llexislatura”, alvirtió.

Na semeya, Ripa y Cristina Tuero, vocera del Conseyu Ciudadanu, el vienres col informe de Presno. Semeya propiedá de Podemos Asturies.