Podemos aceptaría los trés quintos de Foro, anque va defender una mayoría absoluta

“Pidimos una reflexón d’unos díes a los partíos, especialmente a Foro Asturias, pa considerar la posibilidá de que la mayoría reforciada que s’alcuerde pa desendolcar la declaración d’oficialidá sía una mayoría absoluta”, declaró Enrique López Hernández, voceru de Podemos. La formación, sicasí, nun pon esta esixencia como llinia collorada “porque la prioridá ye la oficialidá y la reforma del Estatutu”.

El Conseyu Ciudadanu de Podemos aprobó ayeri un documentu sobre la reforma del Estatutu d’Autonomía qu’apuesta pol alcuerdu pa declarar la oficialidá del asturianu y del gallego-asturiano col preste d’un 88,5 por cientu de los miembros. “Tamos en disposición d’abrir la negociación a los temes que plantega Foro Asturias, incluyíu’l tema fiscal”, aseguró l’ex diputáu, que dulda de los aspeutos llegales de la esixencia d’esti partíu p’aprobar la Llei de Normalización.

“Paeznos razonable qu’haya una mayoría reforciada nel testu, pero los trés quintos que plantega Foro Asturias ye una mayoría perreforciada que namái s’utiliza pa la reforma d’una llei orgánica, como por exemplu l’Estatutu, o pa la designación de los responsables del control públicu, los síndicos y los conseyeros consultivos”, argumentó López Hernández, que defendió pa esti casu “otra mayoría reforciada, como la mayoría absoluta, que s’emplega pa cuestiones como, por exemplu, la escoyeta del presidente”. Nesti puntu rescampló que los servicios xurídicos del partíu treslladaron “duldes xurídiques sobre la viabilidá d’esta mayoría ultrarreforciada”, polo que s’encargó un informe xurídicu esternu que se va treslladar al Conseyu Ciudadanu y a los partíos que negocien la reforma estatutaria.

El martes 9 foi’l primer aconceyamientu a cuatro bandes sobre l’asuntu depués de conocer les esixencies de Foro, clave p’algamar los 27 diputaos necesarios pa la reforma estatutaria qu’incluya la oficialidá. La formación d’Adrián Pumares punxo como requisitu pa entamar coles conversaciones l’aceptación de los trés quintos, aceptáu tanto pola FSA como por Asturies pela Izquierda (IX-IAS) y que’l grupu parllamentariu de Podemos llevó al Conseyu Ciudadanu, órganu máximu de direición convocaú p’ayeri.

Tamién ayeri, nuna entrevista en ‘TPA Noticia Matinal’, la presidenta de Foro, Carmen Moriyón, insistió na so postura de los trés quintos y en venceyar la negociación de la reforma estatutaria cola presupuestaria pa que s’incluyan les sos demandes. “Como aspeutu positivu, señaló que taríen dispuestos a negociar dalgues d’elles, modificando les sos propuestes iniciales”, rescampla’l testu aprobáu.

Aconceyamientu cola ALLA, XLDA y Iniciativa

P’adoptar el so posicionamientu, Podemos aconceyó’l llunes cola Academia de la Llingua Asturiana (ALLA), la Xunta pola Defensa de la Llingua Asturiana (XDLA) y Iniciativa pol Asturianu “pa conocer la so posición na negociación presupuestaria”, atopando diferentes paeceres, “anque percibimos la importancia d’algamar el reconocimientu de la oficialidá, como oxetivu primordial nesta llexislatura, porque ye una oportunidá histórica pola que se lleva esperando décades”. L’esmolecimientu qu’espresa Podemos ye que “quede en papel moyao nun futuru si hai una minoría de 19 diputaos que pueden en cualquier momentu bloquiar cualquier desendolcu de la cuestión llingüística”, señaló López Hernández.

Esta razón ye lo que lleva a la formación morada a pidir una reflexón sobre la posibilidá d’optar pola mayoría absoluta. “Creemos qu’hai que respetar el calendariu que plantegáramos xunto con IX porque nos paez que llegalmente ye l’únicu posible, pero entovía tenemos unes díes pa poder consensuar cuála ye la mayoría reforciada que se necesita p’asegurar que la declaración d’oficialidá nun se quede nel futuru en papel moyao”, insistió’l voceru.

No que respeuta al tema fiscal, apuntó que “hai posiciones, como con respeuto al tema de socesiones, onde les diferencies son mui grandes, porque’l nuesu posicionamientu en temes d’impuestos va en direición contraria: nós defendemos la progresividá fiscal. Sí tamos d’alcuerdu con dalguna cuestión que se plantega con respeuto a la reducción de los porcentaxe del IRPF pa les rentes más baxes o la diferenciación de determinaos porcentaxes a la hora de pagar impuestos pal mediu rural, pa potenciar l’asentamientu rural, o combatir el decrecimientu demográficu”. “Ye una negociación política de caláu y hemos tar al altor de les circunstancies”, aseguró darréu.

Propuesta pa los Presupuestos

El Conseyu Ciudadanu d’ayeri tamién trató’l tema de los Presupuestos. Según anunció López Hernández, Podemos tien “mui avanzada” una proposición pa facela llegar al Gobiernu y la FSA, “pendiente de zarrar dalguna propuesta d’inversión de los conceyos”.

“La nuesa intención ye apurar los tiempos pa intentar pesllar un bon alcuerdu presupuestariu”, afirmó. Podemos cuenta con aprobar documentu definitivu esta mesma selmana “pa sentanos a negociar cola mayor urxencia posible” un presupuestu “social que respuenda a les necesidaes de la xente n’Asturies”.

Na imaxe, López Hernández y Cristina Tuero, vocera del Conseyu Ciudadanu. Semeya obra d'Iván G. Fernández.