Podemos esixe una DOP pa la lleche asturiano, lo más sano d’Europa según un informe del CSIC

“Anque la lleche asturiano ye lo más sano d’Europa, ensin DOP nun ye posible identificar la so procedencia”, apunta Podemos Asturies tres conocer l’informe del CSIC que la certifica como la menos contaminao del continente. Entiende que ye la única forma de que'l productu d'orixe asturianu pueda llegar al consumidor.

L'informe del Conseyu Superior d’Investigaciones Científica (CSIC) sitúa a la lleche asturiano como la más sano d’Europa al ser la menos contaminao. Los niveles baxos de dioxines fai que la nuesa producción sía líder nesti aspeutu con respeuto a otror mercaos más potentes y con más presencia, como l’holandés.

Tres conocer estos datos, el grupu parllamentariu de Podemos rexistró una entruga urxente cola conseyera de Desarrollo Rural y Recursos Naturales, María Jesús Álvarez González, como destinataria. Nella solicita-y qu’esplique “cómo  pue un consumidor saber si ye d’orixe asturianu, esto ye, ta producío n’Asturies, la lleche que consume”. Dende la formación morada recuerden que pronto volveráse a etiquetar los productos señalando l’estáu d’orixe del mesmu, pero non el país –esto ye, la lleche asturiano envasaríase como español–, “polo que namái una marca de calidá, la Denominación d’Orixe Protexida, serviría pa identificar l’orixe y atender a la demanda de los consumidores que quieren comprar lleche producida n’Asturies”.

“La única lleche que s’identifica como asturiano ye lo de producción ecolóxico, que se destina a la ellaboración de quesos o derivaos llácteos ecolóxicos. Y, a pesar d’esto, nenguna empresa asturiana envasa lleche ecolóxico”, una situación “anómala de la qu'hai tiempu venimos alertando, y ye que nel mercáu nun atopamos nenguna marca qu’identifique a la lleche pola so producción d’orixe asturianu”. Podemos entiende qu’estos datos del CSIC pueden ayudar al sector llecheru asturianu a salir de la situación mala na que s’atopa, polo que solicita l’apoyu del restu de grupos de la Xunta Xeneral a esta demanda.